Polítiques llingüístiques de cuatro paredes

|

Na última selmana, los presidentes d’Asturies y Galicia vienen de xustificar la política llingüística del so executivu na meyora de les instalaciones qu’agospien les instituciones académiques.

Vicente Álvarez Areces dixo’l pasáu xueves en Xixón, na viéspera del entamu de la Selmana de les Lletres, que l’asturianu ta bien como nel Estatutu porque la sociedá convive ensin conflictu, anque dixo qu’hai otros que quieren la oficialidá, “pero son una minoría y tienen tamién otres connotaciones”.

Sicasí, el Presidente dixo que protexen el so usu, el so espardimientu y la so promoción y que ye inxustu calificalos d'opuestos a l’asturianu yá qu’acaben de dignificar les instalaciones “d'una institución que ta reconocida nel nuesu Estatutu, l'Academia asturiana de la Llingua”.

L’executivu gallegu tamién va remocicar les instalaciones de la Real Academia Galega. Ayeri, el Conceyu de la Xunta aprobó una partida de 156.000 euros de la Conseyería de Mediu Ambiente, Territoriu ya Infraestructures pa meyorar l’archivu de la institución.

El presidente de la Xunta, Alberto Núñez Feijoo, ye percriticáu polos defensores de llingua gallega pola so política d’amenorgar la presencia del idioma propiu nel sistema educativu. Sicasí, apuntó que la Xunta aumenta un 20% los fondos destinaos a l’Academia, “que caún lo interprete como quiera”, dixo Feijoo.

 

Contador Estadistiques