Tresportistes d'Asturies van dir a la fuelga'l 27 de febreru si'l Gobiernu nun antiende les sos demandes

El presidente de la Unión Independiente de Trabayadores Autónomos (UITA) y miembru de la Plataforma pa la Defensa del Sector del Tresporte de Mercancíes per Carretera Nacional y Internacional, José Fernández Delgado, dixo güei que ta previsto un paru indefiníu a nivel nacional, asemeyáu al desarrolláu'l pasáu mes de xunu, pal próximu día 27 de febreru si'l Gobiernu estatal nun atiende a les demandes del sector.

Nuna rueda prensa ofrecida n'Uviéu, Fernández Delgado dixo que treslladaron al Ministeriu de Fomentu y de Facienda una serie de reivindicaciones que, de nun atendese "nun cortu plazu de tiempu", van obligar al sector a entamar un nuevu paru de mercancíes. Una movilización a la que convidó a sumase a toles organizaciones empresariales y d'autónomos que s'identifquen colos pidimientos.

Según esplicó, les reivindicaciones fueron acordaes polos representantes de Palataforma de 30 provincies nuna asamblea celebrada en Madrid el pasáu 13 d'avientu.

Asina, la Plataforma va dirixir al Ministeriu d'Economía y Facienda un escritu nel que se solicita la condonación del IVA del añu 2008 y la devolución de toles cuotes pagaes polos tresportistes, incluyíes les compres d'activos fixos. "Si'l Gobiernu financia la mala xestión de la banca privada col dineru de toos, lo llóxico ye qu'aporte una ayuda directa a les empreses del tresporte, que ye una de les columnes vertebrales de la economía del país", esplicó Fernández Delgado, señalando que les empreses tán "asfixaes".

Al Ministeriu d'Economía y Facienda tamién-y reclamaron l'establecimientu d'una carencia de 24 meses "a coste cero" nos creitos hipotecarios y contratos de 'leasing', con partíes al traviés del ICO que solucionen el problema a los retrasos y atrasos que sufren los tresportistes.

La tercer reivindicación presentada güei pola Plataforma se refier a la "aplicación darréu" de la Llei de Morosidá, col establecimientu del cobru de los tresportes 30 díes, con sanciones pa los incumplidores que nun actualicen les sos deudes y con exixencia de responsabilidá patrimonial personal a los sos alministradores.

Dende la Plataforma tamién decidieron dirixir un escritu al Ministeriu de Fomentu pa qu'autorice la suspensión temporal d'autorizaciones de tresportes por un periodu mínimu de dos años, hasta que s'axuste'l sector al contestu actual.

A lo último, tamién reclamen a Fomentu l'actualización del Observatoriu de Costes y la so adautación a les actuales condiciones de demanda, col establecimeintu de midíes sancionadores "mui graves" pa los incumplimientos.

Según esplicaron dende Plataforma, los tresportistes tán "fartos" de que nun se preste atención a los sos problemes. Amás, alvirtió que va dar bona cuenta a Alministraciones población de les empreses que, por mor del paru, realicen espedientes de regulación nes sos plantiyes.

No que cinca a la situación nel Principáu d'Asturies, José Fernández Delgado alertó de "baxaes arriesgaes" en toles empreses, que ronden el 15% y el 20%. "Los trabayadores nun deben dexar engañase, porque los tresportistes qu'ofrecen perbaxo de los costes tienen pocu futuru", señaló.