La Fiscalía va investigar el casu de la Campa Torres

El conceyal popular de Xixón, Manuel Pecharromán, anunció que la Fiscalía aceptó la denuncia y va abrir dilixencies pa investigar les posibles irregularidaes cometíes.

La deuncia de los populares vino tres l'apaición de miles de pieces arqueolóxiques nun zulu de la Campa Torres. Pecharromán aseguró que'l PP va dir apurriendo información a la Fiscalía según la vaigan garrando.
  
En declaraciones que'l conceyal del PP realizó na sala de prensa del Conceyu, afirmó que la preocupación polo que pudo asoceder ye cada día mayor, puesto 15 díes depués de l'apaición d'estos restos, el Conceyu nun facilitó tovía nengún tipu d'información, nin accesu a espedientes, pa comprobar si falten materiales o hubo daños nos elementos apaecíos.
  
Según Pecharromán, nos últimos 15 díes hubo otres denuncies por esti asuntu, provenientes de distintos arqueólogos, y l'equipu de Gobiernu "nun sabe nun contesta". Aseguró que too se solucionó en 24 hores, si se compararen los inventarios de les escavaciones colos inventarios de los materiales atopaos.
  
Amás de solicitar la comparecencia nel próximu plenu del Conceyu del conceyal de Cultura, Xusto Vilabrille, mañana va debatise na Xunta Xeneral del Principáu una moción presentada pol PP nesti sen.
  
Según el conceyal hai munches cuestiones qu'esclarar, por ello van esixise responsabilidaes nel ámbitu alministrativu, penal y políticu. Manuel Pecharromán afirmó que tamos falando del patrimoniu históricu de Xixón, qu'hai que curiar y caltener.