Colunga pide la eliminación del ratio d'alumnos d'asturianu

El Bloque pidió a la Conseyería d'Educación un control de la ufierta d'asturianu nos centros educativos, sobre too na concertada, y la eliminación del ratio mínimu d'alumnos

Nuna rueda de prensa, el parllamentariu d'IU-BA-Verdes, Roberto Colunga, miembru del Bloque, plantegó esta demanda en plena Selmana de les Lletres, y nel periodu de matriculación d'alumnos pal cursu qu'entra. Amás, el voceru de la so organización, Pablo Fernández, pidió la oficialidá del asturianu.

Colunga recordó qu'hai "dificultades en munchos centros" pa matriculase n'asturianu, y que tolos años per estes feches suelen llega-yos denuncies nesti sen. Asina, pidió al conseyeru d'Educación que se mande una circular a tolos centros educativos "recordando que tienen la obligación de cumplir la llei cola materia de la llingua asturiana, y pidiendo a los directores que faigan efectiva y real esa matriculación".
 
Calcó nesti sen nos colexos concertaos, onde "l'índiz de matriculación ye mui baxu, casi ridículu", en comparanza colos públicos". Concretamente, señaló que quitando'l colexu San Lorenzo de Xixón, nel restu de centros el porcetaxe "ye mínimo o de cero". Esta diferencia, según Colunga, débese a que "nun hai realmente un siguimientu sobre la materia, que nun pue tar dependiendo de la intención del director de turnu".
  
Asina, pidió también que se "suprima la ratio pa la llingua asturiana, porque con esta midida nun se respeta la voluntariedá". Recordó que nel casu de l'asignatura de relixón, nun se da esta situación, pues "con un alumnu que se matricule yá se da clase".
  
Pa Colunga, l'asturianu "tien que ser una asignatura normal como les demás, y tien qu'haber la posibilidá d'estudiar otres asignatures en llingua asturiana, como pasa en llugares como País Vascu, Galicia, Valencia, o Cataluña, onde gobiernen el PP o el PSOE".

Pablo Fernández aprovechó la celebración de les Lletres pa demandar la oficialidá del asturianu. Recordó amás al PSOE y al PP que la sociedá asturiana "mayoritariamente apoya a la llingua como dalgo própio y que nun supón nengún problema".
  
Asina, felicitó al "movimientu asturianista", pola so "llexitimidá y dignidá", y pola so llucha "siempre dende criterios democráticos" demientres munchos años.