David Artime recueye'l so segundu premiu Arbidel de cuentos eróticos

El candasín David Artime recoyó ayeri'l III Premiu Arbidel de Relatos Eróticos en llingua asturiana del Conceyu de Ribasella, galardón qu'algama por segundu añu siguíu.

El xuráu seleccionó'l so cuentu, 'El problema vascu', como'l ganador de la edición d'esti añu. L'áccesit foi pa 'La Expedición', del novelista y dramaturgu Dolfu Camilo.
  
El relatu ganador ye una narración erótico-humorística que trata, dende un puntu de vista satíricu, el vieyu tópicu de les dificultaes pa caltener relaciones sexuales en determinaos ambientes del País Vascu, reflexáu nun conocíu cantar del grupu Lehendakaris Muertos, tituláu de la mesma manera que'l cuentu d'Artime. El galardonáu yá se ficiere col primer premiu l'añu pasáu col relatu 'Ella y Ariel'.
  
Demientres l'actu d'entrega, al que nun pudo asistir Dolfu Camilo, Artime espresó irónicamente'l so deséu de que nun-y dean el premiu'l próximu añu porque ta garrando "fama de salíu mental".
  
El Xuráu tomó'l llunes la decisión, tres reunise en Ribasella. Taba formáu por Nieves Otero Paraja, especialista n'asturianu pola Universidá d'Uviéu y profesora d'asturianu, Roberto Glez-Quevedo González, secretariu de l'Academia de la Llingua asturiana y Xandru Martino Ruz, especialista n'asturianu pola Universidá d'Uviéu, y faciendo de secretariu con voz, pero ensin votu, Juan González Martino, conceyal de cultura del Conceyu de Ribasella, qu'entregó'l galardón ayeri.
  
El premiu pal ganador son 1.200 euros y pal áccesit 500, amás de los diplomes acreditativos y una réplica de la fachada del Conceyu de Ribasella. El concursu enmárcase na Selmana de les Lletres llocal que que l'Ayutamientu celebra esto díes, dedicada esti añu al escritor llocal Antonio Martínez Cuétar