Xixón va entamar actividaes si Uviéu llogra la capitalidá cultural

L'alcaldesa de Xixón, Paz Fernández Felgueroso, afirmó que'l Conceyu va entamar actividaes complementaries si Uviéu llogra proclamase como capital cultural europea nel 2016.

Felgueroso realizó estes declaraciones nel salón de recepciones del Conceyu, tres la recepción qu'ofreció a los participantes  nel proyectu européu Grundtvig DICOMP. La rexidora negóse recibir la invitación del Conceyu uvieín pa participar nun actu convocáu pol alcalde Gabino de Lorenzo'l próximu domingu 9 de Mayu, con oxetu de conmemorar el Día d'Europa y apoyar la candidatura de la capital asturiana.
  
La rexidora xixonesa manifestó que la postura de Xixón ye inamovible sobre ofrecer el so apoyu al Conceyu d'Uviéu. Fernández Felgueroso afirmó que foi l'alcalde uvieín que "fixo de menos" a Xixón y refugó'l so apoyu cuando la capital asturiana encabezaba la candidatura al empar de la villa de Xovellanos y Avilés.
  
Coles mesmes l'alcaldesa de Xixón afirmó nun recibir contestación  a la carta qu'unvió al rexidor uvieín na que-y esplicaba la postura del Consistoriu xixonés nesta nueva andadura d'Uviéu en solitariu.