Darréu quier qu’Areces pida perdón poles sos pallabres sobre la oficialidá

|

Darréu fai un llamáu. “n’especial a la mocedá”, p’acudir a la manifestación pola oficialidá y quier qu’Areces pida perdón por dicir qu’esti marcu llegal yera reivindicáu por una minoria.

La organización diz que la oficialidá ye’l únicu camín pa que’l “mayor padremuñu cultural que tien el país siga vivu y salga d’esta llacediosa situación”. Una situación que pa Darréu ye culpa de PSOE “y los sos cómplices del Gobiernu”, pero tamién del PP, “yá que ñeguen sistemáticamente esti derechu cívicu”.

La agrupación independentista quier qu’Álvarez Areces pida perdón por dicir que la oficialidá yera cuestión d’una minoria, “un insultu a la ciudadanía y a la so cultura, toles encuestes, feches por xente del so partíu, amuesen que los asturianos quieren la oficialidá”

“Les pallabres dAreces, mentirosu crónicu, nun tienen nengún valor al llau de les de la UNESCO y otros organismos de calter internacional, que consideren la oficialidá como única forma de salvar la llingua”, recuerda la organización.

Al empar, Darreú fai un llamáu a participar na manifestación qu’esti próximu vienres 7 saldrá de la Estación del Norte d’Uviéu a les 19:30 hores y qu’entama la Xunta pola Defensa de la Llingua Asturiana. “La mocedá nun pue quedar impasible ente l’etnocidiu y la situación llaceriosa que tien l’asturianu na estaya educativa”, apunten pa finar.

 

Contador Estadistiques