Avall denuncia la falta de proteición de la cueva de Cuartamenero ante l'entamu de les obres del'autovía en Llanes

|

L'Agrupación de Vecinos y Amigos de Llanes (Avall) punxo güei en conocencia del xulgáu d'instrucción y de la Guardia Civil la falta de midíes de la Conseyería de Cultura pa protexer la Cueva de Cuartamentero ante l'actuación que va realizase nel entornu por mor de les obres de l'autovía del Cantábricu y que van suponer la entrada de manquinaria pesada.

Según consta nun comunicáu, la entidá tuvo conocencia'l pasáu día 5 de xineru de que per parte de la empresa encargada de la obra del tramu Llanes-Pendueles van entamase los trabayos nuna finca onde s'alcuentra una cueva, de nome Cuartamentero, catalogada pola Conseyería de Cultura y Turismu.

El día 7, representantes d'AVALL s'entrevistaron con funcionarios del serviciu de Patrimoniu de dicha Conseyería y presentaron un escritu de denuncia alertando del "inminente peligru" qu'amenaza sobre la cueva del Cartamentero al realizase los trabayos na mesma entrada de la Cueva.

Según la organización vecinal, Avall dirixóse en payares a la Conseyería de Cultura alvirtiendo que resultaba "intolerable tamañu y atropellu", puesto que la Cueva de Cuartamentero ofrecere "nicios claros del so valiosu conteníu arquelóxicu al alcontrase nella un craneu práuticamente completu del mesolíticu, que s'alcuentra datáu y espuestu nel Muséu Arqueolóxicu Nacional, y quedaba por esplorar la práutica totalidá de la mesma".

Daos los "graves antecedentes" asocedíos escontra'l Patrimoniu Cultural na realización de la mencionada Autovía, Avall entiende que nun se pue permitir más "pasividá" per parte de los responsables de l'Alministración y se debe torgar que'l llunes día 12 les máquines entamen la destrucción de la Cueva de Cuartamentero.

Contador Estadistiques