El Parllamentu fala n'asturianu

La Xunta Xeneral, en collaboración cola Conseyería de Cultura, celebra güei, a les 13.00 hores, nel Salón Europa, l'actu institucional de llectura de testos n'asturianu.

L'actu, enmarcáu dientro de la XXXI Selmana de Les Lletres Asturianes, dedicada al poeta Xosé Antonio García, va presentalu la presidenta de la Xunta Xeneral, María Jesús Álvarez González, que va entamar tamién la llectura. De siguío, van siguir lleendo los conseyeros de Cultura, d'Educación y de Bienestar Social.

  
Coles mesmes, ta previsto que participen, ente otros, la Directora Xeneral de Política Llingüística, el Síndicu Mayor, el Rector de la Universidá d'Uviéu y la Presidenta de la Real Academia de la Llingua;  De la mesma manera, van intervenir diputaos de los trés grupos políticos representaos na Xunta Xeneral -PSOE, PP ya IX/BA/LV-, diputaos y senadores por Asturies y conceyales.
  
Los participantes van lleer una selección de testos escritos n'asturianu incluyíos nuna publicación editada pola Xunta Xeneral del Principáu con motivu d'esta celebración y que lleva por títulu 'Una botella d'agua, enllena de tierra vivo', estrayíu d'un versu del poemariu "Cuartetu de la Creación" de Xosé Antonio García.
  
El llibru contién un total de 41 relatos cortos escritos por otros tantos autores asturianos especialmente pa esta ocasión a los que se-yos pidió que trataren el problema de la situación ambiental nel 2010, declaráu Añu Internacional de la Biodiversidá.
  
Ente los parlamentarios rexonales que van participar na llectura figuren Diana Camafeita, Servanda García, Pilar Alonso, Benjamín  Gutiérrez, Alfonso Rei, Joaquín Aréstegui, Alfonso Román López, Emilio Pérez Cueva, Reinerio Álvarez Saavedra, Emilia Vázquez y Roberto Colunga.
  
Tamién van lleer los diputaos nacionales y senador Hugo Morán, Carmen Rodríguez Maniega, Pilar Fernández Pardo, José Manuel Cuervo y Carmen  Sanjurjo, asina como los conceyales José Suárez Arias-Cachero (Uviéu) y Diana González (Mieres).