Les matemátiques y la medicina yá falen asturianu

Nesti mes d’abril que ta acabantes de finar, el Centru de Terminoloxía Asturiana (Termast) entamó a ufrir a los falantes les propuestes de terminoloxía matemática y de medicina.

La primera, xubida’l 14 de mayu, ye ‘Terminoloxía Matemática’, una obra de Rubén Fernández Martínez, quien nes pasaes Xornaes d’Estudiu de l’Academia ufrió una conferencia sobre los nomes del aire nel nuesu país; ‘L’aire n’Asturies: un averamientu a la cultura del aire al traviés del léxicu’.

La segunda propuesta ye ‘Terminloxía Médica’ de Xesús González Rato, xubida a la web de Termast el pasáu vienres 30 de mayu. Rato, miembru de Softastur, yá amosó’l so dominiu nos fervidiellos melecinables al ser responsable de la torna al asturianu de ‘Harry Potter’.

Termast surdió en xineru de 2009, tres la robla ente ALLA, Softastur y el Colexu d’Informáticos d’Asturies, pa encargase de les xeres terminolóxiques venceyaes a la llingua. Esti centru surde al traviés de persones o grupos qu’apurren les sos propuestes y son los propios usuarios del idioma los que van dando calter de normalidá a los términos según el so usu o refugu.
 
El Centru de Terminoloxía Asturiana estructúrase al traviés d’una web, a la que se pue acceder dende la páxina de l’Academia, ellí van dir asoleyándose los trabayos sobre campos temáticos concretos; economía, medicina, xurisprudencia…

Pel momentu, Termast yá asoleyó ‘Términos básicos d’Economía y Empresa’ de Guillermo Ovidio Villa Balbona y Fernanda Valdés Rodríguez, y un trabayu de terminoloxía xurídica, de la mano de Nicolás Bartolomé Pérez, qu’esti vienres va ser acoyíu n’Academia de la Llingua como académicu correspondiente. Estes dos obres espublizáronse tamién en papel.