Puigcercós encamienta crear una llegalidá catalana

El presidente d'ERC, Joan Puigcercós, alvirtió que si'l Tribunal Constitucional dicta que l'Estatut nun cabe na Constitución va haber que crear una llegalidá propia en Cataluña.

Nuna conferencia entamada pola Facultá de Filoloxía de Vigo, titulada 'La llingua propia nes sociedá multiculturales', Puigcercós refirióse al tema del Estatut y de la eventual sentencia del TC a entrugues de los asistentes.

Pal presidente republicanu, si'l TC recorta l'Estatut va ser un problema, y añadió que'l so partíu entiende la Constitución "como un puntu y siguíu". "Si nun cabemos na so llegalidá, va haber que crear la nuesa llegalidá", sorrayó.
  
Apuntó al rumor de que l'oxetivu seya "cargase'l modelu d'inmersión llingüística que paradóxicamente cuenta col aval del TC", amás de recordar que la voluntá mayoritaria en Cataluña ye d'autogobiernu, citando aspectos como la recaudación d'impuestos, la llenda de competencies, la billateralidá, el control de les grandes infraestructures y la definición de fechos identitarios. Nesti contestu, alvirtió de que si nun se cabe nesa llegalidá, va tener que crease la so propia llegalidá, algo, según reconoció, bono de dicir pero difícil de facer.

Según Puigcercós, en Cataluña empezó a apaecer un "independentismu estratéxicu", un "post-federalismu" qu'atribuyó a la fartura de Madrid. Tres esto, señaló que'l presidente de la Generalitat, José Montilla, nun ye independentista, pero piensa qu'hai un encaxe "y per parte del PSOE tán echándolu d'España".
  
Na so opinión, nun hai otra salida que "un divorciu tranquilu", en considerando que la independencia de Cataluña ye una posibilidá real. "Naide va ayudar, pero naide va a oponese", aseguró, n'indicando que'l senu de la Unión Europea ye favorable.
  
"Son munches les coses qu'unen a catalanes y españoles, pero'l respetu ye importante", apuntó, de la que consideró que se perdió'l respetu y la reconocencia y nesi momentu lo más sano ye un bon divorciu".
  
Puigcercós, que dio la conferencia en catalán pero respondió en castellán a les entrugues, apostó pola normalización de la llingua catalana, pese a que precisó que nel contestu multicultural qu'esiste nesti momentu tien de ser "llingua común", superando asina'l conceutu de llingua materna o propia.
  
Asina, calcando en que les sociedaes nun son nin puen ser monollingües, marcó'l so oxetivu de facer del catalán una llingua pública común "nuna sociedá onde esisten munches llingües", por cuenta de los fluxos migratorios. Ello ye que esplicó qu'en Cataluña fálense güei hasta 200 llingües distintes.