Los escolinos gallegos cuerren en defensa de la so llingua

Ayeri entamó en Compostela la undécima edición del ‘Correlingua’, una carrera que va finar el próximu 14 de mayu en Verín y onde los escolinos cuerren en defensa del so idioma.

Baxu’l llema 'Gallegu: la fuercia del nuesu amor', en referencia a un poema d’Uxío Novoneyra, autor homenaxáu nel Día das Letras Galegas, los escolares de la comarca de Santiago sumáronse a la iniciativa convocada pola Asociación Socio-Pedagóxica de Galiza, a CIG-Ensino, Mesa pola Normalización Lingüística y el propiu Conceyu de Santiago.

A la fin de la carrera, los neños participantes acudieron a la Plaza del Obradoiro, onde vieron una representación teatral onde se facía una metáfora sobre la muerte del gallegu. Llueu, los actores fixeron llectura del manifiestu del Correlingua, redactáu polos alumnos d’un IES de Ribadeo, onde se diz “qu’en gallegu tamién se lliga” y se fala de la importancia de falar esti idioma “na casa, colos collacios, falar gallegu siempre”.

Dende la organización del Correlingua criticaron la política llingüística de la Xunta de Galicia y la falta de sofitu del mesmu Gobiernu gallegu nesta edición. Güei’l Correlingua ta n’Ourense, mañana en Ribadeo y hasta’l próximu 14 de mayu, dos díes enantes del Día das letras galegas, la carrera percorrerá casi toles comarques del país vecín.