El PAS entama una campaña esplicativa sobre la oficialidá
|
4 Mayu, 2010 por Damián Barreiro
- Inicie sesión o rexístrese pa espublizar comentarios
El PAS va asistir a la manifestación pola oficialidá y van repartir los folletos de la so última campaña, na que critiquen les postures de los partíos mayoritarios haza l’asturianu.
Militantes de Xuventú Asturianista y del PAS van repartir los folletos de la so campaña esplicativa, “a favor de la oficialidá de la llingua asturiana y escontra les mentires de los partíos mayoritarios sobre l’idioma” na manifestación pola oficialidá que convoca la Xunta pola Defensa de la Llingua Asturiana, esti vienres 7 de mayu, XXXI Día de les Lletres Asturianes.
Nos folletos asoleyaos pol PAS, que van presentase nun actu de la Xuventú, esti xueves 6 a les 19:30, na Llibrería Alborá de Xixón, amuésense les declaraciones recientes de los llíderes de les “sucursales” asturianes d’IU-BpA, PSOE y PP, ente les que tán negaciones de la propia esistencia de la llingua, promeses incumplíes d’usu del asturianun na Xunta Xeneral y casos de marxinación llingüística a ciudadanos, ente otres cuestiones.
El Partíu Asturianista diz que los culpables de la situación de la llingua asturiana tienen nomes y apellíos, “son los llíderes de los partíos que mos vienen gobernando nos trenta años últimos, que lloñe de normalizar l’idioma d’Asturies, fueron arrequexándolu cada vegada más”.
El PAS afirma que lleva pidiendo la oficialidá de la llingua asturiana dende la so fundación, va 25 años, y consiguió aprobar la Llei d’Usu del asturianu en 1998, “la única llei que permite defender a los usuarios del asturianu de los abusos del gobiernu del PSOE ya IU-BpA (col sofitu del PP) sobre los ciudadanos”.
El PAS afrima esperar qu’esta seya la cabera manifestación pola oficialidá, anque ye consciente de qu’esto namás va ser posible si se consigue facer del asturianismu políticu verdaderu, una fuercia influyente nes decisiones que se tomen na Xunta Xeneral.
“El PAS trabaya pa volver a la Xunta Xeneral y consiguir pa tolos asturianos la oficialidá y la normalización social del asturianu”, apunten pa finar.
Efrén d'Andrés
