Zalia cede al Aeropuertu d'Asturies una panera del sieglu XIX

Zalia y Aena firmaron un conveniu pa la cesión al Aeropuertu d'una panera del sieglu XIX, nel marcu del compromisu compartíu pal caltenimientu y promoción del patrimoniu cultural.

Zalia (Zona d'Actividaes Loxístiques y Industriales d'Asturies), previa autorización de la Conseyería competente en materia de Cultura acordies con la Llei de Patrimoniu Cultural, cede la panera a Aena pa la so colocación y esposición nun espaciu públicu de la infraestructura aeroportuaria.

La panera, construyida en 1851, de madera y pegollos de piedra tien una planta d'aproximadamente de 50 metros cuadraos. La construcción retiróse de la so llocalización orixinal nel términu municipal de Xixón de resultes de les obres que la Zalia ta realizando pal desarrollu de la zona d'actividaes loxístiques. Nesti momentu la instalación ta desmontada y curiada nes instalaciones de Zalia y, tres la firma del conveniu, va procedese al so treslláu al recintu aeroportuariu.
  
La panera va instalase a la entrada del Aeropuertu d'Asturies nun espaciu públicu axardináu asitiáu a la derecha del vial d'entrada, al par de la dársena de llegada d'autobuses.