El TSXA anula'l nomamientu de más de 250 funcionarios

El Tribunal Superior de Xusticia anula’l nomamientu de más de 250 puestos de Xefes de Serviciu, Coordinadores, Asesores, Analistes, Interventores y asemeyaos del Principáu.

El Conceyu por Otra Función Pública n´Asturies, que foi quien entamó la demanda, diz qu’otra vuelta la xusticia refierta-y al gobiernu d’Areces que’l sistema ordinariu de promoción na función pública ye’l de concursu de méritos y non la llibre designación a deu, “que ye lo que quier esti gobiernu clientelista pa poner nos cargos burocráticos a los funcionarios que-y pete y caciplar per ellos”.

Recuerden que la sentencia coincide con unes declaraciones de la conseyera responsable de la Función Pública, Ana Rosa Migoya, nes que defiende´l sistema de nomamientu a deu frente al de concursu de méritos “porque ye muncho más completu dende’l puntu de vista d’afitar la eficacia na xestión”.

“Espardiendo estes burraes la conseyera asítiase en clara rebeldía escontra la Constitución Española que nos sos artículos 23.2 y 103.3 proclama’l drechu fonderu de tola ciudadanía al accesu y promoción na carrera alministrativa en condiciones d’igualdá, méritu y capacidá, defendiendo’l retornu al sistema decimonónicu de la alministración como botín políticu”, apunten dende’l Conceyu.

L’asociación diz qu’al empar qu’esixen la renuncia darréu de la conseyera Migoya, piden la intervención urxente de la Xunta Xeneral del Principáu, “pa qu’apare esta retafila despropósitos y restableza’l sistema constitucional dientro de la Función Pública de la Comunidá Autónoma d’Asturies”.