El Bloque diz que Consuelo Vega tien el discursu d'amigos de los bables

Bloque por Asturies acusó a la Direutora Xeneral de Política Llingüística, Consuelo Vega, de tar na "primer llinia de fueu del discursu acomplexáu y paletu d'amigos de los bables".

El voceru de la organización, Pablo Fernández, criticó asina les declaraciones de la responsable autonómica, qu'ayeri, nuna entrevista en Radio Nacional afirmaba qu'en casu de plantegase la oficialidá del asturianu, será na próxima reforma del Estatutu d'Autonomía, pero cuestionaba qu'hubiere apoyu bastante.

Fernández consideró "sarcástica l'actitú de Consuelo Vega, que coles sos declaraciones ta saliendo del armariu de los amigos de los bables". Recordó que la Direutora Xeneral "argumentaba col tema de la imposición nel so día, y agora col de la demanda social, cicuta oficial d'esta cofradía, que la coloca na primer llinia de fueu d'esti discursu paletu y acomplexáu".
  
"Lo próximo será declarar el día de les lletres que l'asturianu nun ye un idioma sinón un dialeutu, que será la tercer pata de la cicuta", señaló. Dende'l Bloque llamentaron "qu'esta persona tea ocupando esti cargu, dao que cola so actitú ta echando per tierra tol trabayu del so antecesor nel mesmu, amás d'empuercar a tol movimientu asturianista y a la so llucha pola so dignificación del nuesu idioma".
  
Afirmó que "el reconocimientu xurídicu y alministrativu del asturianu, la oficialidá, depende de la sensibilidá democrática y el nivel cultural de dirixentes del PSOE y PP, que nesti momentu ye tercermundista". Sicasí, recordó que "la sociedá asturiana, nes encuestes, yá s'espresó nesti sen favorablemente, dando una lección de civismu y de sen común".
  
Entrugáu por si les declaraciones de Vega podíen influir na decisión de la formación el próximu día 22, cuando trate la conveniencia o non de continuar nel gobiernu autonómicu, Fernández respondió que sí. "Si facemos una valoración xeneral del gobiernu, evidentemente tamién influirá, anque no que más pesu vamos poner ye nel tema de la incineradora, pero'l de la llingua habrá qu'analizalu tamién", acabó.