El PSOE acusa a PP de despreciar les llingües minoritaries

Los senadores vascos del PSOE acusaron a PP y UPN de despreciar les llingües minoritaries con argumentos estrambóticos pa refugar una reforma del Senáu.

Los representantes socialistes nel Senáu Lentxu Rubial, Roberto Lertxundi y Yolanda Vicente, destacaron güei, nuna rueda de prensa celebrada en Bilbao, la importancia pal vascu de l'aprobación de la toma  en consideranza d'esta iniciativa, qu'apoyaron tolos grupos, incluyíos los de comunidaes que "nun tienen llingua propia", a nun siendo PP y d'UPN.

Lertxundi criticó que, "pa sorpresa de muncha xente", el Partíu Popular "negó la toma en consideranza y vino a dicir 'd'esto nun hai que debatir'", igual qu'Unión del Pueblo Navarro. Esti refugu, alvirtió, prodúxose, "non con argumentos de política llingüística, sinón contra'l nacionalismu", como si "les llingües fueren propiedá de los nacionalistes d'equí o d'ellí".
  
"Realmente con argumentos estrambóticos y despreciu a les llingües minoritaries, veníen dicir que, habiendo la llingua que falen 400 millones, pa qué hai que falar llingües que falen mediu millón", llamentó.
  
Nesti sen, consideró "que-yos va costar, tanto al PP como a UPN, defender esti tipu d'argumentos equí" porque "a ver con qué cara plantegen que el vascu nun tien que tener la normalización política que precisa" nel País Vascu o Navarra. "Va se-yos difícil d'esplicar", aseguraron.
  
D'esta manera, el senador vascu reivindicó que la llingua vasca "tien qu'algamar unos niveles de normalización completos". Por ello, señaló que ye "importante" que'l so usu nel Senáu "se materialice", anque "haya pocos senadores que seyan a falar n'esquera nesti momentu", puesto que, según indicó, namás cinco representantes socialistes y ún del PNV son vascofalantes.

Na mesma llínea, la senadora Yolanda Vicente defendió que l'usu de toles llingües oficiales nesta Cámara "amplía la democracia" nun momentu nel que se ta poniendo en duda, hasta, el nuesu sistema democráticu" y, amás, ye "patrimoniu de tola ciudadanía". Según indicó, les llingües nun tienen de ser "elementu de confrontación", sinón "d'unión ente distintes cultures".
 
Vicente dixo nun entender que, "si fiximos posible que'l vascu, el catalán y el gallegu se publiquen por tol mundu y que se conoza nel Parllmentu Européu les distintes llingües cooficiales", na Cámara que se pretende seya "la cámara territorial por escelencia" nun se falen a pesar de que "lleven recoyíes na Constitución dende hai 30 años".
  
Llamentando que nel debate d'ayeri nun se contara con "el máximu consensu posible", apuntó que "reflexones como se fixeron ayeri per parte del PP ponen en duda cuála ye la defensa del usu de les llingües".
  
Los senadores socialistes indicaron la necesidá de "facer frente" a la reforma del Senáu, "a la que'l Partíu Popular niégase", y apuntaron que "esti tipu d'actividaes qu'avancen hacia la visibilidá d'una Cámara territorial ye l'espeyu d'un país plural y complexu, como ye España y el País Vascu".

En cuanto al costu que podría carretar la estensión del usu de les llingües, Lentxu Rubial esplicó que tovía nun tán calculaos, y añadió que, en cualquier casu, "hai que miralu pel llau positivu" porque se va a dar emplegu a persones y a empreses que se dediquen a traducción simultánea".
  
La senadora socialista esplicó que, n'aprobándose la toma en consideración, la iniciativa va tener que "pasar por Comisión y Plenu", polo que nun se prevé que puea aprobase "non antes de la vuelta del branu".
  
El cambiu va estudiase, según indicaron los senadores vascos, tres les trés reformes anteriores plantegaes nel 2004, pal so usu na Comisión de Comunidaes Autónomes y na presentación d'escritos oficiales, nel 2005, pal so usu na publicación d'iniciatives ciudadanes o de partíos, y nel 2007, que "abrió la puerta a lo que s'aprobó ayeri".