Areces diz que la oficialidá ye cuestión d’una minoría

Areces dixo que l’asturianu ta bien como nel Estatutu porque la sociedá convive ensin conflictu, anque dixo qu’hai otros que quieren la oficialidá, “pero son una minoría”.

El presidente del Principáu fixo estes declaraciones mientres un alderique en Xixón, nel pieslle del Seminariu d’Emplegu de periodistes europeos "Crisis y lecciones".

Areces señaló que’l bable, “nun quieren llamalu asina dalgún, yo si”, ta incorporáu nel Estatutu, “diz bable y les sos variantes”, y les fuercies mayoritaries nun quieren convertilo en llingua oficial “pero proteximos el so usu, el so espardimientu y la so promoción y respetamos esa convivencia natural qu'hai”.

P’Areces, la ciudadanía ta a gustu con la situación llingüística d’anguaño, “porque tenemos perfectamente asumida la defensa, la promoción, la inclusión nel sistema escolar por vía voluntaria, que foi un ésitu porque hai miles d'alumnos nel sistema educativu ensin nengún conflictu”.

Afirmó qu’hai posiciones que quieren más, “y que tendríen tamién otres connotaciones”, pero qu’estes son minoritaries. Tamién dixo que ye inxustu calificalos d'opuestos a “la llingua” y punxo d’exemplu qu’acaben de dignificar les instalaciones “d'una institución que ta reconocida nel nuesu Estatutu, l'Academia asturiana de la Llingua”

El Presidente recordó qu’hai zones estremaes de fala; “nel Occidente la fala, como ellos quieren llamala, llinda col gallegu y hai una interrelación del gallegu col bable perclara, que produz una zona estremada”.

Areces dixo sentise satisfechu de facer una bona convivencia y algamar bon resultáu col idioma del país, “tantu como cuando fui direutor d'Educación como na política d'estos once años”.

“Podemos vivir con esti Estatutu”

Areces tamién tuvo tiempu pa culpar al PP de frañar el procesu negociador pa la reforma del Estatutu d’Autonomía con una reivindicación “inasumible” del Alcalde d'Uviéu. “La capitalidá nun la ñega nadie, pero hai que dar imaxe de cercu a Uviéu, ye un localismu negativu pa que cualesquier pueblu puea avanzar”, apuntó.

Sicasí, señaló qu’Asturies pue vivir col testu d’anguaño y recordó la crisis del gobiernu de Sergio Marqués, “producida ente otros pol señor que güei  pretende presentase de candidatu como salvador de la situación actual”

Sobre la identidá asturiana apuntó que’l nuesu país tien un fondu sentíu de la mesma, “podría tener polítiques identitarias pero nunca lo fixo porque se sintió parte integrante d'España, convivió cola idea d'España perfeutamente y convive nel esterior y fixense que tenemos una historia de sieglos pa reivindicar munches coses”.

P’Areces tamos nun mundu distintu onde los sentíos d'identidá hai que reforzalos pero dientro d'una idea global, “de sentinos nun mundu al que tenemos que dar respuestes dende la integración y dende la non esclusión".