Ḷḷena nun quier llinies d'alta tensión pel conceyu

La unanimidá del Plenu del conceyu de Ḷḷena refugó güei “de forma contundente” el pasu pol conceyu de nueves llinies d'alta tensión pa la construcción de Sama-Velilla.

La Xunta de Castiella y Llión propón modificar el trazáu previstu de la llinia Sama-Velilla, construyendo la mesma peles llinies yá esistentes, lo que significaría'l pasu de la instalación per Ḷḷena al traviés del puertu Payares.

Los grupos municipales afirmen que’l conceyu yá soporta infraestructures que tuvieron un importante impactu sobre'l so mediu ambiente, “como l'autopista, el gaseoductu Llión-Llanera o anguaño, la obra ferroviaria pal pasu de l'Ave, lo que supunxo una importante trasformación del nuesu ecosistema y la nuesa redolada”.

L'equipu de Gobiernu, formáu por Izquierda Unida y Bloque por Asturies, nun considera que seya necesaria la llinia al ser Asturies excedentaria na producción enerxética. Amás, afrimen que dicha llinia “namás respuende a los intereses económicos de les empreses eléctriques”.

Tamién quixeron dexar claro que nun ta d’alcuerdu cola construcción de la linia, “trescurra'l so trazáu per Ḷḷena o pol conceyu d'Ayer, lo que nun queremos pa nós, nun lo queremos pa naide", añaden. De la mesma manera, van dar cuenta d'esti alcuerdu al gobiernu del Estáu.