Los futuros maestros d’asturianu aprenden a usar Ubuntu

Softastur dio una charra sobre Ubuntu a los futuros maestros d’asturianu. Amás, anunciaron la salida’l mercáu güei de la nueva versión d’Ubuntu, traducida dafechu al asturianu.

La charra celebróse ayeri miércoles na Facultá de Ciencies de la Educación de la Universidá d’Uviéu. Nella, los componentes de Softastur, desplicaron los conceutos básicos d'esta mena de Software, la ética qu'arrodia a los trabayos de la comunidá llibre, y la importancia del so usu na Educación. "Un finxu básicu na educación, ye l'accesu a la información" y l'espíritu de "compartir" que'l software llibre promueve.

A los asistentes desplicóse-yos el funcionamientu d'Ubuntu a nivel d'usuariu, y tamién empobináu a la enseñanza primaria. Softastur fixo una amuesa de la versión educativa d'Ubuntu con exemplos práuticos pa escolinos, al empar qu'anunció'l llanzamientu güei mesmo de la nueva versión d'Ubuntu, que l'asociación considera totalmente traducida en llingua asturiana. Tamién avanzó Softastur, que la suite ofimática OpenOffice va venir incluyía por defeutu y en llingua asturiana nesta versión.

Nel actu, los asistentes pudieron comprobar el funcionamientu y conocer l'estáu del correutor ortográficu nel que trabaya Softastur dende fai un añu, y que cuenten tener disponible en 3 o 4 meses". Esta ye una herramienta normalizadora más, qu'asitia a la llingua asturiana na estaya de les nueves teunoloxíes, "igual que'l restu de les llingües".

Pa tolos interesaos, Softastur fixo anuncia qu'esti fin de selmana (vienres 30 y sábadu 1) va cellebrase una install party en Ribeseya a la que pueden asistir toos aquellos que quieran instalar esti sistema operativu.