Caxastur llogra 53,7 millones de beneficiu nel primer trimestre

El grupu Caxastur llogró nel primer trimestre del añu 2010 un beneficiu netu atribuyíu de 53,7 millones d'euros, con una leve reducción del 1,1 por cientu.

Según la entidá la xestión del negociu típicu bancariu, la positiva aportación de la cartera de participaciones y la meyora de la eficiencia, dexaron al Grupu elevar los marxes brutos y d'esplotación y algamar el beneficiu netu atribuyíu.
  
Amás, según informó Caxastur, la política de xestión de riesgos permitió reducir, nel primer trimestre, la tasa de morosidá en 15 centésimes, asitiándola nel 3,08 por cientu, ente les más baxes de les entidaes de créditu.
  
No referente a los niveles de solvencia, según el Grupu son "de los más elevaos del sector", con un coeficiente de recursos propios de primera categoría del 12,7 por cientu, doblando los requerimientos normativos, lo que supón un superávit de fondos propios de más de 860 millones.
  
Amás les axencies de rating confirmaron la solidez del grupu, calteniendo Fitch la calificación al llargu plazu A y otorgando una nota equivalente Moody's, que na so primer evaluación a Caxastur asignó-y A2 al llargu plazu. Sicasí, la entidá sigue adoptando midíes p'amenorgar los costos d'alministración col fin de meyorar los sos niveles d'eficiencia y competitividá.
  
Pese al entornu económica de recesión, el Grupu Caxastur caltuvo estable'l volume de negociu, qu'algamó los 24.200 millones d'euros, un 0,45 por cientu menos en términos interañales. La inversión creiticia rexistró un saldu vivu brutu de 10.791 millones d'euros, un 1,11 por cientu menos que nel mesmu periodu del añu anterior. El financiamientu a families elevóse un 7,51 por cientu, mientres que se siguió col procesu de desatascu nel sector de la construcción. Nel conxuntu del trimestre, concediéronse 6.482 préstamos y creitos, con importe total de 509 millones d'euros.
  
Los recursos garraos, incluyíos fondos, subieron a 13.405 millones d'euros, lo que supón un aumentu interañal del 0,10 por cientu. Los recursos garraos de particulares rexistraron un crecimentu del 2,13 por cientu, destacando la elevada subida de los fondos d'inversión y de pensiones, superior al 16 por cientu.