Vilabrille niega la desapaición de descubrimientos arqueolóxicos

El conceyal de Cultura de Xixón, Justo Vilabrille, negó  la presunta desapaición de restos arqueolóxicos de la Campa Torres y esixó al PP que rectifique les sos acusaciones.

Vilabrille afirmó güei nuna rueda de prensa nel Centru de Cultura Antiguu Institutu, que'l Conceyu demostró un tratu "esquisitu y dilixente" nel descubrimientu y la protección del patrimoniu cultural y artísticu de la ciudá. Ello ye qu'apuntó, poques ciudaes puen presumir d'invertir hasta'l 2007 un total de 9.800.000 euros n'investigación, ellaboración de la Carta Arqueolóxica de Xixón, escavaciones o la construcción de tres museos, ente otres cuestiones.

  
Según el conceyal de Cultura "la escandalera del PP" nun tien fundamentu y solo respuende a un  espectáculu frívolu que pretende esviar l'atención sobre otres cuestiones, como ye l'apoyu del ex ministru Francisco Álvarez Cascos a la candidatura de Santander pa optar a la Capitalidad Cultural Europea nel 2016.
  
Vilabrille afirmó que los restos arqueolóxicos qu'apaecieron en  Marzu del 2009 fueron inventariaos pola empresa MS Arquera, a la que'l Conceyu realizó-y esti encargu por un presupuestu de 11.800 euros. Según desveló esti estudiu, que desveló los sos resultaos n'ochobre del 2009, 8.322  d'estos oxetos escoyéronse y otres 330 caxes conteníen material xeneral de "escasu valor".
  
Xusto Vilabrille achacó l'apaición d'estos oxetos a la remodelación del Muséu de la Campa Torres y aseguró que daten de les últimes escavaciones, que puen enmarcase ente los años 1989 y 2000. Afirmó que s'atopen en bon estáu y que tuvieron de ser los arqueólogos que les atoparon los que tuvieron que dar avisu al  responsable de les escavaciones y ésti a l'Alministración.
  
Según manifestó la conseyería de Cultura y el Conceyu roblaron nuna acta pa depositar nel Muséu Arqueolóxicu d'Asturies tolos restos atopaos na Campa Torres dende 1978 a 1988, restos que güei yá tán de vuelta nel Muséu de la Campa.
  
D'últimes el conceyal de Cultura manifestó que los ciudadanos puen tar tranquilos y convencíos de que'l patrimoniu de la ciudá ta en bon estáu y bones manes.