35.150 firmes pa que les cuentes de la Casa Real seyan públiques

El PCE entregó nel Congresu les 35.150 firmes qu'axuntó en tres meses pa la campaña '¿En qué gastes el mio dineru?' pa esixir que les cuentes de la Casa del Rei seyan públiques.

Esta campaña, qu'entamó en Madrid el pasáu 20 de xineru, acabó'l 9 d'abril y desarrollóse pente medies de la colocación de meses de distintos conceyos y tamién al traviés d'internet. Concretamente, 25.371 firmes van en pliegos, 5.502 algamáronse al traviés d'internet, y 4.277 pente medies d'adhesiones en redes sociales.

Les firmes recoyíes van rexistrase nel Congresu pa la so tramitación na Comisión de Pidimientos y tamién ta previsto qu'Izquierda Unida presente una iniciativa coles mires de facer tresparentes les cuentes del Xefe del Estáu.
  
La intención de los comunistes ye que se dea un debate parllamentariu que conlleva l'adopción de midíes tendentes a establecer un control públicu de les Cuentes de la Casa Real, según que les donaciones y regalos que recibe'l Rei", na so condición de Xefe d'Estáu, seyan "tresparentes y pasen al patrimoniu del Estáu".
  
"Nesti momentu nin los diputaos, nin el Tribunal de Cuentes, nin la Fiscalía, nin los Tribunales, nin siquier la Comisión de Secretos Oficiales, tienen accesu a esta información, a pesar de que se diz que Xuan Carlos I tien un patrimoniu de más de mil millones d'euros", plantega'l PCE.
  
El PCE destaca que l'añu pasáu la Casa del Rei disfrutó de nueve millones d'euros al cargu de los Presupuestos Xenerales del Estáu, un 2,7 por cientu más que l'añu anterior. Sicasí, a pidimientu de la Xefatura del Estáu, nesti exerciciu la so asignación conxelóse pola crisis económica.

El secretariu xeneral del PCE, José Luis Centella, afirmó a les puertes del Congresu qu'esti ye un actu de "radicalismu democráticu". "Los qu'intenten desprestixar la defensa de la República acusándomos de radicales namás evidencien la so falta de carácter democráticu. ¿Ye más radical defender la República o siguir calteniendo una situación de defensa y tapecimientu de corrupción que nun ye propia d'una democracia?", argumentó.
  
Al so xuiciu, con esta iniciativa faise efeutivu'l "derechu ciudadanu" de reclamar la tresparencia de les cuentes de la Casa Real,  de la qu'aseguró nun entender "por qué sigue siendo un furacu negru en cuanto a la conocencia de les sos cuentes y xornales", y sorrayó que "lo que s'escuende ponse baxo sospecha ".
  
Centella animó al rei Xuan Carlos a "dar un pasu alantre" y facer él mesmu públiques estes cuentes, pa que los españoles s'enteren de "si Letizia tien un xornal o cuánto gana'l Príncipe, asina como en qué distribúin esos más de 1.500 millones de les antigües pesetes" que reciben cada añu, "que ye muncho dineru pa que namás figure nun epígrafe nos Presupuestos Xenerales del Estáu".
  
Finalmente, el partíu recuerda que según la prensa belga, la Monarquía española ocupa'l tercer llugar nel ranking de les Cases Reales europees y axunta unos 1.700 millones d'euros en fortuna y patrimoniu. Asina, Centella aspiró a que cola Casa Real española asoceda como cola belga, puesto que n'internet cualquier persona pue consultar con facilidá toles asignaciones de la Familia Real d'aquel país.