Entamen les actividaes de L'Arribada 2010 falando de diarios dixitales

Entamen les actividaes de ‘L’Arribada 2010’, nesti casu les que correspuenden a la estaya ‘Rolda 2010’ con una mesa redonda sobre los diarios dixitales n’asturianu.

Nel alderique quier abrise un debate sobre la realidá de los medios redactaos na nuestra llingua esistentes na rede, dende los xeneralistes a los de conteníos culturales. L’actividá ta programada pal viniente vienres, 30 d’abril, a les 20:00 hores. El llugar sedrá’l Centru Municipal Integral de L’Arena, en Xixón Nº cai Canga Argüelles, 16-18.

La edición viniente de L’Arribada, que yá ye la quinta, tendrá’l so empiezu nel mes d’abril y l’acabu nel mes de payares, ye dicir, les actividaes de l’Arribada* allongaránse durante 8 meses. Pa ello, dixébrase en tres estayes.

Una d’elles ye ‘Vagamar 2010’, que nos sos campos lliterariu y cultural seguirá presentándose como’l noyu de l’Arribada, y onde de continuo y en dellos díes de la segunda metada del mes de setiembre desarróllase un númberu importante d’actos de toa mena, teniendo como sede al Centru Cultura Antiguu Institutu de Xixón y el Centru Municipal Integráu de L'Arena.

Mientres que ‘Per Asturies 2010’, agrandará’l camín abiertu na edición de 2009, entamando xornaes de l’Arribada per otros conceyos d’Asturies, amás del de Xixón que ye’l qu’acueye lo más del calendariu del eventu. Esti añu vuelve entamase en Villaviciosa y a esti conceyu van añadise dos más, ún del centru d’Asturies y otru de la fastera más occidental del país.

Pa finar, ‘Rolda 2010’, axuntará un conxuntu d’actividaes a facer nel conceyu Xixón, pela rede municipal de centros, n’ateneos culturales, en centros educativos y n’establecimientos collaboradores. Esti eventu permitirá desestacionalizar l’amuesa de productos lliterarios y culturales arreyaos a la llingua asturiana, abriendo asina L’Arribada a la participación de nuevos coleutivos.