Ecoloxistes y xuristes alerten contra'l ruíu nes ciudaes asturianes

La Coordinadora Ecoloxista d’Asturies y l'Asociación de Xuristes contra'l Ruiu afirmen qu’l nivel sonoru mediu diariu nes ciudaes asturianes supera los valores almitíos na lexislación.

Mañana, 29 d'abril, celébrase'l Día Internacional de Concienciación sobre'l Ruiu y afirmen que d'alcuerdu a los datos facilitaos pol Principáu de les sos estaciones de control de contaminación el tiempu que tuvieron funcionando, superen los 65 decibelios que ye'l nivel sonoru establecíu pola OMS (Organización Mundial de la Salú) como llende de tolerancia al ruiu.

Según informen, en Xixón hai medies añales de 68 decibelios, n'Avilés y Samartín de 67, en Mieres 66, n'Uviéu 65, en Cangas Narcea 63 decibelios y en Llugones de 57.

Les agrupaciones denuncien “que'l Principáu retirara los sonómetros de les estaciones de control, polo que yá nun vamos saber más el nivel de contaminación acústica, una dexación de funciones d'obligáu cumplimientu nun intentu vergonzosu de barrer la basura debaxo de l'alfombra”.

Apunten que’l ruiu tien de considerase como un contaminante medio-ambiental de primer orde con efeutos nocivos importantes sobro la salú de la población y la so calidá de vida.

“Ye necesariu que los conceyos tenga una mayor implicación y dilixencia na atención de les denuncies por ruiu que sufren los vecinos”, señalen. Ecoloxistes y xuristes, esixen amás, que pa un control d'estes denuncies, tolos conceyos de más de 20.000 habitantes tendríen de tener personal capacitáu pa realizar midíes de ruiu y sonómetros homologados y permanentemente cubicaos.