La sidra de mazana seleicionao adelanta la so salida al mercáu

La sidra de mazana seleicionao adelanta por primer vegada na historia la so salida al mercáu al mes d'abril y dende güei va disponese de les primeres botelles de la collecha 2009.

Avalada por por un certificáu de garantía de calidá y ellaborada por Sidra Trabanco, Foncueva, Muñiz, La Nozala, Peñón y El Gobernador, la Sidra de Mazana Seleccionao preve algamar una producción de 1,7 millones de botelles na collecha 2009. Asina lo anunciaron los llagareros qu'ellaboren esti productu de calidá, mientres la Presentación de la Collecha 09 celebrada esta mañana, nel Xardín Botánicu Atlánticu de Xixón.

El voceru de la sidra de mazana seleicionao y xerente de Grupu Trabanco, Samuel Trabanco, manifestó que con esta iniciativa, pretenden recuperar una tradición que yá se taba perdiendo y que consistía en prebar la primer sidra del añu a primeros de primavera.
  
"Les característiques de la collecha 2009 dexábenmos desarrollar esta idea, qu'esperamos preste a el consumidores de sidra, tanto n'Asturies como n'otres zones d'España, indicó.
  
La que güei se pon nel mercáu ye una sidra que tovía nun se trasegó, esto ye, reposa tovía sobre les sos propies madres de fermentación. Esto apúrre-y unes característiques particulares y diferenciaes dafechu.
  
"Ye una sidra más vivo, muncho más mozo. Caltién los arumes de fermentación y presenta un tastu muncho más afrutáu. Apostar por esti tipu de sidra tien el so riesgu, porque'l consumidor nun ta avezáu a probar la sidra ensin trasegar. Pero ye una manera de recuperar una tradición que yá se taba perdiendo y, per otra parte, ye una bona forma de dir introduciendo novedaes nel sector", asegura José Manuel Riestra, xerente de Sidra Muñiz.
  
La producción d'esta collecha 2009 va algamar, previsiblemente, un volume de 1,7 millones de botelles. Esta cifra ye namás un 13% superior a la rexistrada na collecha 2008, cuando la producción total cifróse en 1,5 millones de botelles.
  
Sicasí, los llagareros de mazana seleicionao esperen qu'esta producción de 1,7 millones de botelles seya bastante p'abastecer a mercaos nacionales y pa siguir coles incursiones en mercaos internacionales que ta desarrollando esta sidra, que se comercializa en dellos países d'Europa, América... y hasta en zones d'Australia.