Suatea diz que s'incumple la llei al nun garantizar asturianu en Primaria

El sindicatu educativu Suatea, vien de culpar a la Conseyería d’Educación de tar incumpliendo la llei al nun garantizar que l’asturianu y l’eonaviegu tean presentes na Educación Infantil.

Al entamu del cursu pasáu  (2008-2009) el sindicatu Suatea plantegó un recursu contencioso-alministrativu nel Tribunal Superior de Xusticia d’Asturies contra’l Decretu qu’establez el currículu del segundu ciclu d’Educación Infantil, solicitando la so anulación por vulneración del artículu 10 de la Llei d’Usu por falta de regulación de los conteníos d’asturianu, “pues nel currículu sustituyóse la referencia a la llingua pola locución ‘cultura asturiana’ y nel nomáu artículu 10 de la Llei d’Usu recuéyese que l’asturianu va ser considerao como materia integrante del currículu”.

Na sentencia dictada por esti tribunal, nel mes d’avientu del añu pasáu, desestímase’l recursu por considerar nos fundamentos de derechu de la sentencia, que la llingua asturiana sí ta presente nel currículu d’Educación Infantil como defendió la parte demandada (Principáu d’Asturies) incluyida ente los conteníos de cultura asturiana.

“Les enseñances mínimes del segundu ciclu d’Infantil organícense n’aries, y ente los conteníos de cultura asturiana recuéyese l’asturianu, dao que la mesma constitúi una manifestación cultural al respeuto”, indicaba la sentencia del Tribunal Superior.

El sindicatu diz que, teniendo en cuenta esta sentencia, “deduzse que l’alministración educativa tien de garantizar que la llingua asturiana y l’eonaviegu s’imparta n’Educación Infantil y esto nun ta pasando”, yá que según el sindicatu namás’l 13% l’alumnáu d’Infantil recibe enseñanza de llingua,mientres qu’en Primaria esa proporción xube hasta’l 55 %, “y ello chócamos porque cuasi tol alumnáu ta integrao nos centros de Primaria col mesmu equipu direutivu que xestiona la eleición d’estos conteníos”.

Suatea diz que l’alministración nun fixo nenguna campaña informativa del derechu a recibir enseñanza en llingua asturiana o eonaviegu na educación primaria, nin mandó nenguna circular o instrucción a los centros informando del procedimientu  pa materializar el derechu de los padres y madres a elixir la formación llingüística los sos fíos y fíes.

“Tenemos noticies de centros que tán demandando ampliar la ufierta de les enseñances de llingua a y ta contestándose-yos dende la Conseyería Educación que los centros nuevos que lo demanden nun se van a atender porque nel currículu d’esta etapa nun figura la llingua asturiana. A aquellos que yá teníen llingua enantes de la publicación del currículu siguirán siendo atendíos”, afirmen dende’l sindicatu.

Poro, dende Suatea esixen a la  Conseyería Educación la ufierta xeneralizada de la enseñanza d’asturianu na Educación Infantil, amás de les disposiciones reglamentaries qu'amuesen a les clares los conteníos, midíes organizatives,  y recursos materiales y humanos que se dedicarán a  la enseñanza de les llingües propies na Educación Infantil.

Dende Suatea tamién soliciten la puesta en marcha de planes de  formación del profesoráu d’EI en llingua asturiana y gallego-ssturianu na formación permanente, la collaboración cola univesidá pa que nos planes d'estudiu universitarios nuevos se cree la Mención de Llingua Asturiana nel Grau de Maestru/a d’EI, “yá que la Mención de Llingua solo ta prevista pal Grau de Mestru Primaria y non pal d’Educación Infantil”.

Amás de la valoración y reconocimientu de la especialidá nel nuestru idioma nel accesu al puestu de trabayu por ella y nos concursos de tresllaos, oposiciones y llistaos d'interinidá de toles otres especialidaes y la previsión del aumentu  de puestos d'especialistes de Llingua nes plantiyes del 2010, apunten pa finar.