La Plataforma d'apoyu a El Ferreiro presenta 15.000 firmes

La Plataforma d'apoyu a Pepe El Ferreiro presentó 14.614 firmes nel Rexistru Xeneral pa solicitar la realmisión de José Naveiras nel Muséu Etnográficu de Grandas de Salime.

"Pretendemos que la Conseyería de Cultura reconsidere la so postura y dexe sin efectu'l cese pa que José Naveiras vuelva ser el director del Muséu", esplicó en declaraciones a Europa Press Roberto Naveiras, fíu de Pepe El Ferreiro.
  
Los miembros de la Plataforma, con representación de 150 asociaciones, entamaron una marcha dende la Plaza de La Xesta d'Uviéu hasta'l Rexistru. Toos ellos, col fíu del ex direutor del Muséu Etnográficu al frente, portaron les firmes d'apoyu a José Naveiras en dos carretilles.
  
Según indicó Roberto Naveiras, si Cultura nun reconsidera la vuelta d'El Ferreiro, la Plataforma va siguir realizando "reivindicaciones de carácter pacíficu", campañes informatives a les puertes del Muséu, y charres sobre la figura de José Naveiras. "Anque esto nun salga alantre vamos siguir lluchando pola cultura", esplicó.
  
Nesti sen, Naveiras aseguró que'l so padre estima la reconocencia popular "a una vida dedicada n'esclusividá a la entidá". Amás, recordó que la Plataforma recibió apoyos de toa Asturies y Galicia, pudiendo arrexuntar casi 15.000 firmes cuando sumen trés meses del cese.
  
Preguntáu pola vinculación de la Plataforma cola agresión sufrida pol actual director del Muséu, Francisco Cuesta, el fíu d'El Ferreiro aseguró que se trata d'una "falacia" que "namás pretende tapecer otros temes, como'l de la Campa Torres". Dalgo que, nes sos propies pallabres, "pon en cuestión la profesionalidá de Cuesta". "En Grandas l'ambiente ta revueltu y siempre hai alguna salida de tonu, pero nunca afalada nin aprobada pola Plataforma", xustificó.