Coxersa aprueba l'entamu de la construcción de la incineradora

El conseyeru d'Infraestructures calificó'l día de "históricu" tres l'aprobación, por 100 votos a favor, 12 en contra y una astención, del entamu de la construcción d'una incineradora.

Francisco González Buendía, na rueda prensa posterior a la votación de Coxersa, destacó que d'equí p'arriba s'entamen unos trámites "bien llargos, complexos, ambientales y urbanísticos" pa que sobre'l 2015 la planta de valorización enerxética d'última xeneración tea funcionando. Si la so construcción se retrasare, apuntó que se falaría d'alternatives nel 2013.

Eso sí, dexó claro que l'aprobación de güei pon fin a un debate entamáu yá nel 2003 y que la construcción de la incineradora nun significa l'abandonu del recicláu. Ello ye que señaló qu'ente'l 2010 y el 2015 va desarrollase un esfuerzu enorme" en polítiques de reciclaxe y concienciación. "Nun ye frutu d'una ocurrencia", añadió.
  
"Acabóse la política de l'avestruz", indicó antes d'añadir que se felicitaba pola aprobación de la incineradora. Buendía criticó que "algún paracaidista" viniera a una xornada d'un día pa falar de les bondaes de ciertos sistemes cuando nun conoz la realidá d'Asturies nin el modelo de Coxersa.
  
Ente la posibilidá de que se presente alguna denuncia, pidió que les persones que se muestren tan actives sobre esti tema séanlo tamién pa llevar alantre'l deséu de la mayoría de los conceyos.
  
La planta aprobóse, en porcentaxes, por un 72,16 por cientu del total de la Xunta -aproximadamente un 17 por cientu nun acudió--, frente a un 8,99 por cientu que votó en contra y un 0,52 por cientu, correspondiente al representante d'URAS nel Conceyu de Villaviciosa, que s'astuvo. Según el titular d'Infraestructures y presidente de Coxersa, el resultáu de la votación foi "lo esperao".
  
El conseyeru indicó que l'aprobación del entamu de la construcción del fornu incinerador produzse dempués d'un perampliu debate social y políticu y añadió que paralelamente hai otres fórmules en marcha o que van entrar en funcionamientu pa tratar que la fracción restu seya menor.
  
P'apoyar la decisión, aludió a algunos de los países europeos que más reciclen como Austria, que cuenta con una planta incineradora por cada millón d'habitantes -una población semeyante a Asturies-, y prepara la construcción de cinco más, Alemaña, Dinamarca o Suecia.
  
Al par de Buendía tuvieron el xerente de Coxersa, Santiago Fernández, un representante del PP, Benjamín Rodríguez Cabañas -conceyal d'Uviéu-, y un representante d'IU, Jaime Gareth -alcalde de Degaña-.
 
En plazu

Fernández, pela so parte, dixo confiar en que tanto los plazos -72 meses-- como'l llogru de financiamientu puean cumplise. Coles mesmes, esplicó que dende'l 2006 nun se moviera "nin un euru nin un papel" a esti respecto, polo qu'agora va haber qu'acondicionar los pliegos de condiciones ellaboraos daquella p'adautalos a la nueva Llei de Contratación Pública, revisar el proyectu, repasar l'estudiu económicu, empezar les xestiones pa llograr créditu, aprobar los nuevos pliegos y sacar a contratación la planta.
  
Sobre'l financiamientu, que s'estima en 250 millones d'euros, esplicó qu'en virtú de los contactos informales col Bancu Européu él piensa que pue financiase, a lo qu'unió delles ufiertes feches per parte de la banca privada. Sicasí, indicó que l'interventor "tien que  facer un estudiu seriu" sobre la necesidá de creitu.
  
Tamién reconoció que los plazos son "correctos", polo que si quier facese bien nun puen dormise. Sicasí, indicó que si se calcula que la vida útil del vertederu ye hasta'l 2015 y la planta ta poniéndose en marcha, podría quemar yá algo nella. Fernández calcó en que va haber que ver cómo evoluciona'l reciclaxe y otres plantes previstes, como la de biometanización. "Sin perder tiempu, pero en plazu", añadió.
 
Refugu d'IU

Pela so parte, l'alcalde de Degaña basóse nel programa electoral d'IU-BA-LV pa mostrar el so refugu a la incineradora, que nun figura nél como métodu central del tratamientu de residuos. Según él, refúguenla por motivos llegales, éticos, medioambientales, de salú, económicos y sociales". Ye más, indicó que nel Plan Básicu de xestión de residuos d'Asturies nun apaez.
 
La meyor de les opciones

Per parte del PP, Rodríguez Cabañas destaco l'apuesta d'Uviéu pola reducción de residuos y citó algunes de les iniciatives puestes en marcha nesti conceyu, como la recoyida puerta a puerta y el correspondiente gravame pa les comunidaes que nun reciclen o'l recicláu d'aceite domésticu pa dempués usalu nos autobuses urbanos.
  
Nesti sen, resaltó que nel 2009 lleváronse a Coxersa les mesmes tonelaes de basura qu'en 1997, pese a la subida de población y de nivel de vida. El conceyal uvieín anunció la intención de desarrollar más actuaciones pa que los ciudadanos tean más comprometíos col Mediu Ambiente. Por too ello, indicó qu'ante l'acabación de la capacidá del vertederu nel 2015 hai que tomar les decisiones menos males y apuntó que les que se tán adoptando son "les meyores", polo que'l PP votó a favor de la incineradora.
 
Alcuerdu por mayoría

La Xunta de Gobiernu ye l'órganu supremu de xestión y alministración de Coxersa. Ta integrada por dos representantes de caúna de les entidaes consorciaes, escoyíos por elles mesmes. Tán representaos tolos conceyos y el Gobiernu del Principáu d'Asturies.
  
L'alcuerdu aprobáu pola Comisión Delegada inclúi encamentar a la sociedá instrumental Coxersa S.A. la construcción de la planta, na so integridá, "puesto que d'esta manera evítase que l'endeudamientu resultante consolide nes entidaes que participen nel Consorciu".
  
Tamién s'establez que, teniendo en cuenta que la inversión estimada ye de 250 millones d'euros y al nun disponese de recursos abondos, se recurra pa la so financiación a los recursos ayenos necesarios.
  
L'alcuerdu tamién establez "adautar el proyectu de la planta de reciclaxe de basura bruta pa facer posible la producción de Combustible Deriváu de Residuos (CDR) que puea valorizarse nes cementeres y proceder de la mesma manera a la so licitación, contratación y puesta en marcha", aina como encamentar a los Conceyos y al Gobiernu del Principáu a la realización d'un "esfuerzu adicional" en reciclaxe, tanto nel fomentu de la recoyida selectiva como nel usu de productos y materiales reciclaos.