L'Academia tendrá la so nueva sede nel monasteriu de Les Pelayes

El Presidente del Principáu, Vicente Álvarez Areces, ufierta a l'Academia de la Llingua una sede nes antigües dependencies del Arquivu Históricu Provincial, nel monasteriu de San Pelayo.

La propuesta prodúxose nuna xunta ente’l presidente d'Asturies, Vicente Álvarez Areces, y la presidenta de l'Academia de la Llingua Asturiana, Ana Cano, na sede de Presidencia, a la que tamién asistieron la Conseyera de Cultura y Turismu, Mercedes Álvarez González, la Direutora Xeneral de Política Llingüística, Consuelo Vega Díaz, el vicepresidente de l'Academia de la Llingua, Miguel Ramos Corrada, y el secretariu d'esta institución, Roberto González Quevedo.

Al términu de la xunta, la Conseyera declaró que'l monesteriu de Les Pelayes, como se conoz popularmente, ye ún de los edificios más destacaos d'Uviéu, y el so allugamientu, en plenu cascu hestóricu conviértelu nun llugar afayadizu p'agospiar una institución tan venceyada a la investigación y la cultura asturiana como l'Academia.

"La comunidá benedictina del Monesteriu ye tamién un exemplu de continuidá y permanencia, les mesmes que dende'l Gobiernu queremos pa la cultura y la llingua asturiana con esta sede pa l'Academia; una sede dignísima, nun edificiu y una redolada nobles y históricos. Un llugar privilexáu y ampliu, que supon un esfuerzu importante pal Principáu nun momentu amás d'axuste económicu", apuntó Álvarez.

Según informen dende’l propiu Gobiernu, Areces asumiera'l compromisu d'allugar a l'Academia nuna sede digna y afecha a les necesidaes actuales de la institución. El presidente aprovechó l'alcuentru pa felicitar a Ana Cano pola so trayeutoria como presidenta de l'Academia, destacando la so llabor investigadora, científica y normalizadora, asina como la collaboración col Gobiernu en proyeutos d'interés común, como la promoción esterior del asturianu o la recuperación de la toponimia tradicional.

Anque l'edificiu ta en bones condiciones, con calter inmediatu entamarán les obres de reacondicionamientu del local necesaries pal so nuevu usu, que podrían llevase a cabu en 6 o 8 selmanes, y enantes del branu, podrá inaugurase la nueva sede de l'Academia de la Llingua Asturiana.

Esta yera una de les mayores reivindicaciones de l’ALLA, yá que na actual sede, un pisu na uviéina cai Marques de Santa Cruz, l’Academia nun tien espaciu pa una biblioteca y un depósitu de llibros. L’actual llar, estrenáu en 1983, diba ser, yá daquella, dalgo provisional a la espera de les tresferencies a la Conseyería de Cultura. A la fin, trenta años depués, consíguese un allugamientu céntricu, con espaciu pa les distintes oficines, p'almacén y p'archivu.
 
L'edificiu
 
El monasteriu de San Pelayo ye un monasteriu femenín de la Orde de San Benitu. Na so parte posterior atopábase hasta va poco más d’un mes l'Arquivu Hestóricu d'Asturies, anguaño asitiáu nel remodeláu edificiu de l'antigua Prisión Provincial d'Uviéu. Nesa zona sedrá onde va tener la so sede la máxima institución llingüística d’Asturies.

El monasteriu ye fundáu pol rei Alfonso II el Castu dedicándolo nun primer momentu a San Xuan Bautista de les Dueñes. Créese que'l patrociniu del templu ye obra de Teresa Ansúrez, vilba de Sancho, el Gordu, de Lleón.

L'edificiu foi remocicáu atopándose nos sos cimientos restos románicos de claustru. La primera gran reforma ye del añu 1650 cola construcción de la torres de Melchor Velasco. Nel sieglu XVII vuélvese a reedificar la estructura por Roza y Fco. de la Riva y L. de Guevara, afamaos arquiteutos que-y dan l’aspeutu actual al conxuntu. En 1590, Leonardo de la Cajiga reconstrúi la ilesia. En 1703, Frai Pedro de Cardeña, constrúi la Vicaría (fachada actual).