La Selmana de les Lletres entama en Mieres el 3 de mayu

|

Yá se conocen los actos colos que’l Principáu va celebrar la XXXI Selmana de les Lletres. Llibros, exposiciones y llectures públiques pa homenaxear al mierense Xosé Antonio García

El programa d’actos de la Selmana de les Lletres entama’l llunes 3 de mayu, a les 11.30 hores nel Salón d’actos de la Casa de Cultura de Mieres, cola pertura oficial de la Selmana y la presentación de la edición conmemorativa ‘Xosé AntonioGarcía, un poeta nel fin de sieglu’, que va facilitar l'acercamientu del gran públicu a la vida y l'obra del escritor, ilustrando amás, con numberoses reseñar y fotografíes, l'Asturies de les últimes décades del sieglu XX. Esta publicación ta coordinada pol escritor y direutor de la Casa de Cultura de Mieres, Ismael González Arias.

Nel actu va presentase tamién ‘Poesía’, que recopila la obra poética más significativa del autor homenaxáu. Axunta los poemes publicaos a lo llargo de los años en distintes revistes, los dos llibros editaos en vida (‘Cuartetu de la criación’ y ‘Alcordances d’un home muertu’), y tamién un bon númberu de testos inéditos, que la familia facilitó atentamente a los dos estudiosos encargaos d'esta edición: l'escritor y críticu lliterariu José Luis Argüelles, responsable del estudiu introductorio; y la filóloga Laura Rodríguez Solís, que s'ocupó de la edición y notes.

Tamién va inagurase la esposición ‘Xosé Antonio García, un poeta nel fin de sieglu’, que tará abierta al públicu hasta’l 31 de mayu n’horariu de 9:00 a 21:00 hores de llunes a vienres. La entrada sedrá llibre. Al día siguiente, el martes 4 de mayu, la Biblioteca de la Casa de Cultura de Mieres, va acoger delles visites escolares d’animación a la llectura.

Yá nel miércoles, a les 12 hores y tamién na Casa la Cultura, va produxise una declaración institucional del Ayuntamientu de Mieres y el descubrimientu d’una placa dedicada a Xosé Antonio García. Mientres qu’a les 20 hores, nel Auditoriu de la Casa la Cultura, va facese un actu d’homenaxe de los ganadores del Premiu “Teodoro Cuesta” a Xosé Antonio García, nel XX aniversariu del premiu. L’actu cuntará cola actuación de los hermanos Valle Roso.

El xueves 6 de mayu, a les 13 hores, la Xunta Xeneral del Principáu d’Asturies, acoyerá la celebración de la llectura pública institucional de testos n’asturianu. Mientres que’l vienres, Día de les Lletres Asturianes, a les 12:00 hores nel Auditoriu de la Casa la Cultura, va entamase l’actu escolar institucional de celebración de la Selmana de les Lletres Asturianes, cola intervención d’autoridaes, la entrega de premios del “XV Concursu de Poesía y Dibuxu” y del “VII Concursu de Cartelismu”, aás de delles actuaciones.

El sábadu 8 de mayu, a les 14 hores, la Radio del Principáu d’Asturies (RPA), emitirá “Xose Antonio García, vida d'un poeta”, emisión especial del programa “Nomes d’Asturies”, que fai un repás pelos fechos y personaxes más importantes de la historia del país al mou de les radionoveles de los años 50 y 60.

El vienres 7 de mayu ye’l Día del Llibru Asturianu y en collaboración coles llibreríes, tiendes de discos, editoriales, fonográfiques y distribuidores, va haber un 10% de descuentu na compra de llibros n’asturianu y regalu, hasta la fin d’esistencies, del llibru ‘Xosé Antonio García, un poeta nel fin de sieglu’ nes más de 50 llibreríes y tiendes participantes de tol país.

Collaboren na celebración l’Ayuntamientu de Mieres, la Xunta Xeneral del Principáu d'Asturies, la Conseyería d'Educación y Ciencia, el Conseyu de Comunidaes Asturianes, el Centru Asturianu de Castellón, el Centru Asturianu de Barcelona, la Radio Televisión del Principáu d'Asturies, el Colexu Públicu Aniceto Sela y les llibreríes, tiendes de discos, editoriales, fonográfiques y distribuidores.

Día de les lletres nel Esterior

En collaboración col Conceyu de Comunidaes Asturianes, el Centru Asturianu de Castellón y Centru Asturianu de Barcelona, va celebrase’l Día de les Lletres nel Esterior.

El programa d’actos será’l sábadu 22 de mayu en Castellón y al día siguiente en Barcelona. Nes dos ciudaes los actos entamarán nos sos centros asturianos a les 12 hores coles intervenciones institucionales. Darréu vendrá una conferencia de Roberto González-Quevedo, un recital de Berta Piñán y l’actuación de La Bandina’l Tombo.

L’homenaxáu
 
Xosé Antonio García (Santa Bárbara, Mieres, 1961) fixo estudios de Filoloxía Románica y Hispánica na Universidá d’Uviéu, interesándose pol afondamientu nes llingües clásiques: llatín, griegu y árabe. Desendolcó una intensa actividá cultural dende los años setenta, dirixendo programes radiofónicos o participando nel mundu editorial. Collaboró en revistes lliteraries como “El cuélebre literario” y “Mallku” (coordinaes pol tamién mierense Nel Amaro) y en “Lletres Asturianes”. Ye autor de dos llibros de poesía: “Cuartetu de la creación” (1989) y “Alcordances d’un home muertu” (1995). Xosé Antón García morrió prematuramente nel añu 1997.
 
Contemporaneu d’autores de la segunda xeneración como Antón García, Lourdes Álvarez o Berta Piñán, desarrolló’l llabor lliterariu alloñáu de xuntances, tendencies y afinidaes grupales, pa componer una de les obres poétiques más fondes, personales y enigmátiques del Surdimientu. Dexó inédita una curtia producción narrativa, tanto n’asturianu como en castellán, ye principalmente un poeta figurativu, esistencialista, que reflexona sobre la condición humana y sobre la muerte.

 

Contador Estadistiques