L'Academia asoleya'l númberu 27 de Lliteratura

L'Academia de la Llingua acaba publicar el númberu 27 de la revista Lliteratura, que recueye una selección de relatos, poemes y artículos de 13 autores asturianos.

Ente ellos alcuéntrense histories de ciencia ficción, dramátiques y gamberraes xuveniles, asina como dellos poemes de diversa temática, ente los que s'inclúi una versión asturiana del 'haiku' xaponés, y dos crítiques lliteraries.
  
El númberu yá ta distribuyéndolu l'Academia, baxo la dirección de Xosé Bolado y con Paz Fonticiella, Vicente García Oliva, Inaciu Llope, Miguel Ramos Corrada, Xuan Bello y Lluisa Suárez Sáez, como miembros del Conseyu de Redacción.
  
Dientro de la estaya de narrativa, figura'l relatu 'Una puerta', de Berta Piñán, una alegoría sobre les relaciones humanes xusto antes de la muerte, 'Un cuentu chinu', de la mesma autora, amás de 'Prímula II Planeta Fin', de Dolfu Camilo, una historia de ciencia ficción ambientada nun futurista Xixón. David Artime aporta un sarcasmu 'gamberru' sobre'l sentimientu d'asturianía, tituláu 'Odio a los putos asturianos'. 'Mieu' d'Amalia Trancho, y 'Cuestión d'estraterrestres' y 'La situación', de Nel Morán completen esta parte.
  
Na sección de poesía, Marta Mori aporta'l so poema 'Agua', y Sofía Castañón inclúi un estractu del so poemariu 'Tiempu de render', col que ganó'l premiu Nené Losada. Berto García apurre'l so 'Haikunariu', mientres Rubén d'Areñes aporta 'Montaña China', y Xabel Vegas escribe una esbilla de poemes inéditos.
  
A lo último, puen lleese les crítiques de Vicente García Oliva, una presentación del llibru 'La poesía llírica asturiana', y de Xosé Bolado, que fai un análisis de la poesía de Rubén d'Areñes.