Netanyahu refuga'l pidimientu de conxelar les construcciones

El primer ministru israelín fixo llegar a la Casa Blanca'l so refugu al pidimientu que-y fixere Obama, de que se conxelare la construcción de nueves viviendes en Xerusalén Este.

Obama reunióse con Netanyahu'l pasáu 23 de marzu na Casa Blanca nun intentu por algamar la continuación de les conversaciones de paz ente israelinos y palestinos, y anque nun se reveló'l conteníu de debate esi día, sí se sabe qu'ún de los pidimientos estadounidenses foi que se conxelen los planes pa construyir en Xerusalén Este, según les fontes consultaes pol 'WSJ'.

Dende esi alcuentru les conversaciones ente Washington y Tel Aviv permanecieron prácticamente conxelaes, hasta que, según el diariu, el pasáu fin de selmana'l Gobiernu israelín dio a responsables de la Casa Blanca la so respuesta negativa al pidimientu treslladáu por Obama.
  
Fuentes de la oficina de Netanyahu confirmaron al diariu israelín 'Haaretz' qu'ésti refugó conxelar la construcción de nueves viviendes nel asentamientu de Ramat Shlomo. La so construcción anuncióse coincidiendo cola visita a Israel del vicepresidente norteamericanu, Joe Biden, y depués de que palestinos y árabes espresaren la so conformidá cola propuesta estaounidense de conversaciones indirectes ente les partes.
  
Responsables estaounidenses señalaron al 'WSJ' que Washington nun cree qu'esta postura de Netanyahu suponga'l fin de les negociaciones, puesto que'l primer ministru hebréu accedió a casi una docena de midíes que podríen llevar a retomar el diálogu. Ente estes midíes figura la lliberación de prisioneros palestinos en cárceles israelines, la llegada de bienes a la Faza de Gaza y la retirada de más controles de carretera en Cixordania.
  
Coles mesmes, el Gobiernu israelín tamién dixo que se comprometería a ampliar l'área de responsabilidá de les fuerces de seguridá qu'operen en Cixordania, asina como a debatir cuestiones concretes como les fronteres o l'estatus de Xerusalén en cualquier nueva ronda de conversaciones colos palestinos, yá seyan directes o pente medies d'un mediador estadounidense.

Per otra parte, el 'Wall Street Journal', afirma que responsables de l'Alministración Obama debatieron nes últimes selmanes la posibilidá de que la Casa Blanca fixe los sos propios puntos de referencia y calendariu pal procesu de paz si los esfuerzos actuales pa volver a entamar les conversaciones fracasen.
  
Sicasí, les fontes consultaes pol rotativu esclararon qu'una midida d'esti tipu nun ye inminente y sorrayaron que Washington confía en qu'israelinos y palestinos accedan voluntariamente a retomar les conversaciones directes.
  
Según les fontes estaounidenses, el Gobiernu israelín tuvo treslladando la so posición al traviés del conseyeru pa Oriente Próximu de la Casa Blanca, Dennis Ross, n'ocasiones 'puenteando' al unviáu especial estadounidense pa la rexón, George Mitchell. Esta decisión interpretóse por algunos na Alministración Obama como un intentu de marxinar a Mitchell en favor de Ross, que defendió la cooperación de Washington con Netanyahu en llugar de la confrontación.