La FMC diz que los afayos de la Campa Torres tán inventariaos

La Fundación Municipal de Cultura de Xixón diz que los afayos de la Campa Torres foron alcontraos na primavera de 2009 y que namás alcontralos dieron conocencia de la so esistencia.

Énte les noticies apaecíes relatives al afayu d'un conxuntu de materiales y pieces arqueolóxiques alcontraes na Campa Torres, la Fundación Municipal de Cultura diz que  la so esistencia púnxose en conocencia del Muséu Arqueolóxicu d'Asturies y de la Conseyería de Cultura, d'alcuerdu a lo esixío na Llei del Principáu d'Asturies de Patrimoniu Cultural.

Apunten, qu’informada la esistencia del afayu, la Fundación Municipal de Cultura procedió al rexistru, reetiquetao y reembalao de los materiales pa garantizar la so preservación. Una vegada remataes estes xeres d'inventariáu, el pasáu 9 abril de 2010, informóse del so resultáu a la Conseyería de Cultura, “nuevamente d'alcuerdu a lo axustao na Llei del Principáu d'Asturies de Patrimoniu Cultural, inventariáronse un total de 8.322  pieces”.

Señalen qu’anguaño, les pieces atópense curiaes ya inventariaes nel Parque Arqueolóxicu-Natural de la Campa Torres, “a la espera de la confirmación per parte de la Conseyería de Cultura  pal so depósitu temporal, que permitirá la so esposición nel Parque Arqueolóxicu-Natural de la Campa Torres”.

Les pallabres de la Fundación vienen depués de qu’un mediu de comunicación informara del descubrimiento nun zulu de más de 20.000 pieces provenientes de les escavaciones feches na Campa Torres.