Euronews propón emitir en catalán pa tol mundu

Euronews presentó a la Generalitat un proyeutu pa que la so canal puea siguise en catalán, el representante n’España de la canal fala “d’un golpe de mano de Cataluña n’Europa”.

La cadena europea, formada por un consorciu de cadenes públiques, vio en payares pasáu cómo l'entós presidente de RTVE, Luis Fernández, terminaba cola participación del ente públicu español na cadena. L'aportación añal de RTVE a la canal de noticies europea yera de dos millones d'euros.

Dende la salida del ente públicu español, Euronews ta intentando que la presencia del castellán na cadena tenga presencia pola proyeición en Llatinoamérica, polo que los responsables de la canal europea de noticies tán buscando alcuerdos coles televisiones autonómiques y esperen algamar un alcuerdu cola Forta, entidá na que ta la TPA.

El representante pa España de Euronews, David del Valle, asegura que si esta canal de noticies emitierá en catalán "sería un golpe de mano de Cataluña n'Europa". "Na actualidá emitimos en nueve idiomes, pero nun tenemos nengunu que seya d'ámbitu autonómicu", apuntó.

La distribución d'esa canal, que tresmite dende'l 2003 los premios Príncipes d'Asturies, ye dende 38 satélites y más de 800 plataformes de cable, algamando 325 millones de persones en 153 países. El costu de la emisión en catalán sería de cinco millones d'euros.