El Polisariu alerta de la situación de los saḥarianos en fuelga de fame

El coordinador del Frente Polisariu pa la Minurso, Mohamed Jadad, alertó de la situación crítica na que s'atopen los presos saḥarianos en fuelga de fame en Marruecos.

Jadad alertó de "la gravedá del estáu de salú" de los presos y de les "series consecuencies" que tendría una eventual traxedia sobre les posibilidaes de resolución del contenciosu del Sáḥara Occidental. Jadad, miembru del Secretariáu Nacional del Polisariu, realizó estes declaraciones ayeri domingu nuna entrevista a la televisión nixeriana y recoyida pola axencia de noticies saḥariana SPS.

El dirixente destacó "el conteníu y la fuerza del mensaxe" d'estos activistes de Derechos Humanos pa la comunidá internacional y el Conseyu de Seguridá de la ONU y "la so insistencia sobre los derechos lexítimos del so pueblu", destacando "la necesidá urxente crear un mecanismu internacional pa supervisar y protexer los Derechos Humanos nel Sáḥara Occidental".
  
Per otra parte, l'Asociación Marroquina de Derechos Humanos (AMDH), encamentó'l domingu dende Rabat al primer ministru marroquín, Abbas el Fassi, a intervenir "darréu" pa "salvar la vida" de los presos saḥarianos en felga de fame, según informó SPS citando un comunicáu de l'AMDH robláu pola secretaria xeneral del grupu, Jadiya Riadi.
 
Énte la "peligrosa" situación de los s presos, l'AMDH manifiesta la so "gran preocupación" pola posibilidá de que la fuelga acabe en "traxedia" si les autoridaes siguen refugando "abrir urxentemente un diálogu colos fuelguistes pa satisfaer les sos demandes lexítimes".
  
"Pidímos-y qu'intervenga urxentemente como responsable pa cumplir col so deber en cuanto al respecto de los derechos y llibertaes, sabiendo que la cuestión del derechu a la vida ta consagrada na Declaración Universal de los Derechos Civiles y Políticos, ratificada pel nuesu país", sigue l'AMDH.
  
Según el Comité Nacional de Siguimientu de la Situación de los Presos Políticos Saḥarianos en Fuelga de Fame (CNSSPPSHH), dependiente de l'Asociación Saḥariana de les Víctimes de Graves Violaciones de los Derechos Humanos cometíes pol Estáu marroquín (ASVDH), hai un total de 57 presos políticos saḥarianos en cárceles marroquines, de los que 38 tán en fuelga de fame.