Montilla refuga una consulta énte una sentencia con recortes

El presidente de la Generalitat refugó la propuesta del so antecesor, Pasqual Maragall, de convocar una consulta énte una sentencia del Constitucional que rebaxe la llei catalana.

En declaraciones a Catalunya Ràdio recoyíes por Europa Press, aseguró que Cataluña nun pue pidir que se respete l'Estatut pa depués nun respetar lo que dicen les lleis. Recordó qu'al pueblu de Cataluña consúltaselu cada vez qu'hai eleiciones, y "les convocatories tienen de facese colo que diz la Constitución y l'Estatut".

Díxolo al preguntar sobre les declaraciones de Maragall, que'l xueves aseguró que, si'l TC modifica'l testu, tendría de repitise'l referendu que se fixo sobre'l testu nel 2006: "Nun pue ser que la última palabra nun la tenga'l pueblu", dixo l'ex presidente.

Sobre la demanda de Montilla de renovar el TC, el presidente indicó que nos próximos díes va siguir falando d'eso col presidente del Gobiernu, José Luis Rodríguez Zapatero, y el del PP, Mariano Rajoy. Tamién va conversar sobre ello colos líderes políticos catalanes, pa "tratar de configurar posiciones lo más comunes y unitaries posibles".
  
Espera tratar esta renovación con Zapatero y con Rajoy "a lo llargo de les próximes selmanes", y espera falar colos líderes catalanes esta selmana, pa unificar posiciones. Colos dirixentes catalanes yá tuvo conversaciones la selmana pasada.
  
Montilla aseguró que Zapatero comunicó-y la so "predisposición a tratar la renovación". Recordó que yá s'intentó tratar antes, pero afirmó que quedó llancada colos dos nomes que punxo sobre la mesa'l PP.
  
Entós, el PP apostó por dos persones de perfil bien conservador y discutible prestixu y capacidá, dende'l puntu de vista del derechu constitucional", aseguró Montilla, en referencia al ex presidente del Conseyu Xeneral del Poder Xudicial (CGPX) y del Tribunal Supremu, Francisco José Hernando, y a el ex voceru del CGPX Enrique López.
  
Pal presidente de la Generalitat catalana, el TC "nun ta en condiciones" de tratar la sentencia del Estatut, puesto qu'ún de los sos 12 miembros ta recusado, otru finó, y el mandatu de cuatro yá acabó.
  
Caltuvo que, tres les eleIciones catalanes previstes pa la seronda, el tripartitu podría sumar y nun reeditase. Sobre la posibilidá de que PSC, ERC y ICV-EUiA algamen la mayoría absoluta, dixo: "Sería necesario apautar les coses qu'hai que facer, y ye posible que nun tuviéramos d'alcuerdu. Los que dan por fechu que si sumamos, reeditamos, equivóquense", añadió.
  
Montilla reconoció que'l tripartitu que preside nun supo comunicar la so obra de Gobiernu. "Si la xente nun sabe lo que facemos ye qu'algo nun faemos bien", caltuvo.
  
En cuanto al estáu de les infraestructures eléctriques de Cataluña tres la nevada de primeros de marzu, aseguró que se ta trabayando na construcción la llinia de Mui Alta Tensión (MAT) en Girona, proyeutu qu'él impulsó siendo ministru d'Industria, ente'l 2004 y el 2006. "Algunos dicen que nun me preocupé. Lo que se ta faciendo aprobóse cuando yo yera ministru y non antes", añadió.
  
Espresó la so oposición a la demanda de los sos socios d'ICV-EUiA y ERC de nacionalizar el sector eléctricu, y aseguró que lo que nun hai que facer ye "espropiar", sinón introducir controles, lo que ta poniendo en marcha la Generalitat.