Vecinos de Riosa, Morcín y La Ribera refuguen el Tren d’Alta Velocidá

Habitantes de los conceyos de Riosa, Morcín y La Ribera axuntáronse pa torgar les obres del Tren d'Alta Velocidá Madrid-Xixón, que ta previstu atraviese estos conceyos.

Los vecinos denuncien los atropellos sociales y ambientales que se llevaron a cabu y entá se lleven a cabu nel vecín Valle del Güerna (Ḷḷena) pola obra de la Variante de Payares y declaren que nun tán dispuestos a dexar la destrucción del patrimoniu cultural y natural de los sos valles n'ares del beneficiu de les empreses constructores.

Caltienen que'l proyeutu del tren d'Alta Velocidá ye una obra innecesaria yá que’l trayeutu Asturies-Madrid na actualidá yá se ta cubriendo col  ferrocarril Alvia, “otru tren d'alta velocidá, en namás 4 hores y 35 minutos”.

Señalen que pa poder consiguir la velocidá prevista l'AVE precisa un trazáu rectu, lo qu'implica enllenar los montes del centro-sur de Asturies con túneles. Los habitantes de Riosa, Morcín y la Ribera consideren  inadmisible que p'aforrar namás 15 minutos nel viaxe ente L.lena-Xixón, los valles qu’atraviese esta llinia queden estrozaos.

Por estes razones, “y porque el costu d'esti trechu Ḷḷena-Xixón xubiría a unos 1500 millones d'euros”, les persones qu'habiten estes zones del centru de Asturies creen que tienen motivos suficientes pa manifestase a la contra d'esta obra “innecesaria y despilfarradora” y a favor d'unos meyores servicios sociales y un tresporte colectivu de cercanías eficaz.