Obama pon fin a la discriminación de gais hospitalizaos

El presidente d'EEXX ordenó al Departamentu de Salú que ponga fin a la discriminación que sufren los homosexuales nes visites de les sos pareyes a los hospitales.

Obama robló na nueche del xueves un memorandu qu'esixe a los hospitales estadounidenses que dexen que los homosexuales hospitalizaos reciban la visita de los sos compañeros sentimentales y que éstos puean tener poderes llegales nes decisiones médiques qu'afecten a los enfermos

 
El documentu llegal robláu por Obama va anunciase públicamente güei, vienres, indicó al rotativu 'The Washington Post' citando fontes del Gobiernu norteamericanu. Una d'estes fontes indicó que la nueva norma va afeUtar a tolos hospitales que reciban fondos de Medicare o Medicaid, los programes de seguru mélicu del Gobiernu pa les persones mayores, discapacitaes y de menores ingresos.

Nel memorandu, unviáu a la secretaria de HSS, Kathleen Sebelius, Obama diz que busca asegurase llegalmente de que los hospitales "respeten los derechos de los pacientes a escoyer los sos visitantes". El presidente señala la necesidá de que los centros médicos nun discriminen a los sos pacientes en base a la so orientación sexual o a la so identidá de xéneru.
  
"Cada día, en toa América, munchos pacientes ven refugada l'amabilidá y los cuidaos de les persones a les qu'amen", indica nel testu Obama, qu'añede la importancia de tener a los seres queríos al llau cuando se sufre una emerxencia mélica o pasen llargues temporaes d'ingresu nun hospital.
  
La midida va beneficiar, indica Obama, a los "gais y lesbianes d'Estaos Xuníos que frecuentemente se separen de los sos compañeros, que puen tene pasao xunto a ellos décades de la so vida y sicasí nun puen tar al par de la persona a la qu'amen, nin puen actuar como sustitutu llegal si la so pareya quedó incapacitada".
  
Con esta decisión, Obama trata de poner fin a una práctica comúnmente utilizada por munchos hospitales estaounidenses, qu'aportunen en que namás los familiares biolóxicos o matrimoniales de los enfermos tienen de tener permisu p'aportar a les visites y decidir sobre los sos tratamientos. El mesmu 'Washington Post' señala que la midida va somorguiar a Obama de forma direuta nel debate sobre la llegalización de los matrimonios ente persones d'un mesmu sexu.
  
Asociaciones y activistes que lluchen polos derechos de los homosexuales lleven años denunciando'l dolor emocional asociáu a nun poder visitar a la pareya en momentos de grave enfermedá. D'ora manera, los detractores del matrimoniu ente persones del mesmu sexu opónense frontalmente a esta midida y a la posibilidá de que les pareyes de los homosexuales llogren derechos llegales sobre los pacientes.