El gallegu ta perdiéndose ente la mocedá y nes ciudaes

Según l’Institutu Gallegu d’Estatística, el 56,4% de los gallegos fala la so llingua, mientres qu’un 42,6% tien como idioma’l castellán. Los datos son d'una encuesta fecha en 2008.

Los datos d’esti organismu, dependiente de la Xunta de Galicia, nun son mui positivos mirando los del 2003, onde un 61,2% de la población falaba mayoritariamente en gallegu y un 38,3% yera castellanofalante. Según la encuesta, la perdida de falantes ye especialmente dramática nes fasteres urbanes y ente la mocedá.

El 29,6% de neños ente 5 y 14 años empleguen namás el castellán, mientres que’l 15% usa l’idioma propiu. Namás ente los mayores de 50 años, el porcentaxe de gallegofalantes ta per riba de los castellanofalantes. Los porcentaxes son más baxos si miramos pal grau d’alfabetización, namás el 15% de los ciudadanos gallegos escribe davezu en gallegu, mientres que’l 83% usa siempre’l castellán.

El númberu de persones que namás fala gallegu na so vida diaria ye’l 30% d’encuestaos, 13 puntos menos qu’en 2003. Mientres que los monollingúes en castellán son el 20%, cinco puntos más qu’en 2003

Nes ciudaes gallegues l’usu del gallegu como primer llingua ye casi testimonial, con datos que van dende Ferrol, onde menos del 4% de fogares tien l’idioma de Galicia como llingua, hasta Orense, la ciudá más gallegofalante con un 13,5%. La mayor ciudá del país vecín, Vigo, tien menos d’un 4% de falantes, mientres que la capital, Compostela, asítiase nun porcentaxe del 10,45%. Les fasteres onde’l gallegu ye la llingua mayotitaria ye na Costa de la Muerte, Bergantiños, Ordes, Arzúa, Melide, El Carballiño, El Ribeiro, Tierra de Celanova, A Limia, Verín y Viana.