Moratinos diz que la historia va dar la razón na non reconocencia de Kosovu

Miguel Ángel Moratinos refugó nuevamente la reconocencia de Kosovu defendiendo que la posición española ye l'apropiada y al fin "la historia va xulgar a quién tuvo la razón".

Asina se pronunció'l Ministru na Comisión d'Asuntos Esteriores del Senáu depués de que'l voceru de CiU, Joan María Roig, pidiera al Gobiernu que reconoza a esti nuevu Estáu, que proclamó unillateralmente la so independencia en febreru del 2008, porque ye "un imperativu democráticu" y "imprescindible porque nun hai otra salida nesta rexón".
 
Sicasí, d'acordies con Moratinos "la historia va xulgar al que tuvo razón y porque la posición del Gobiernu español foi y ye clave pal futuru de paz y estabilidá nos Balcanes Occidentales". "Tamos faciendo les coses apropiadamente (dao que) la gran mayoría de la comunidá internacional nun reconoció la independencia", anque sí "otros grandes países europeos".

"Respetámoslo, pero a estes altures hai non más de 60 países de los 192 de Naciones Uníes" que reconocieron y amás tien d'haber una resolución de la Corte Internacional de Xusticia (CIJ), sorrayó.
  
Según Moratinos, gracies a la postura d'España en Serbia hai nesti momentu "una clase política que mira al futuru ensin los vieyos nacionalismos y que pacíficamente y constructivamente ta mirando al futuru d'estabilidá nos Balcanes Occidentales".
  
"¿Cómo reaccionaría cualquier país européu o del mundu cuando ensin resolución del Conseyu de Seguridá nin acuerdu ente les partes de la nueche al día llevántase y el quíten-y 15% del territoriu", preguntóse, y too ello, añadió, "ensin una base na llegalidá internacional".
  
Pese a too, "tamos trabayando pa qu'haya cooperación práctica ente kosovares y serbios", y faciendo una presidencia de vez de la UE "constructiva y nun imponiendo la posición española". Coles mesmes, pidió dar "tiempu al tiempu" y va xulgase por qué la posición española ye escepcionalmente positiva pal desarrollu de la estabilidá y el futuru de los Balcanes Occidentales".
 
Croacia y Macedonia

D'otra parte, al respeuto d'esta rexón, agoró que mientres el semestre español van abrise tolos capítulos de negociación pa l'adhesión de Croacia y va haber "meyores". Coles mesmes, tamién consideró que podrá avanzase na perspectiva europea de Montenegru.
  
Coles mesmes, confió en que "na presidencia española puea resolvese'l problema del nome" que torga que l'Antigua República Yugoslava de Macedonia entame negociaciones d'adhesión. Al respecto d'esta cuestión, sorrayó la bona relación con Grecia -que nun quier qu'esti país ente na UE como Macedonia, puesto que ye'l nome d'una de les sos provincies-, y adelantó que va viaxar la próxima selmana a Skopje pa tratar esti tema.
  
Moratinos aprovechó pa pidir a ambes partes que "doblen los sos esfuerzos p'atopar una solución mutuamente satisfactoria" y consideró que "la fixación d'un horizonte temporal sobre l'entamu de negociaciones va contribuyir la consolidación de la estabilidá" de Macedonia.