Mozos y moces de Ḷḷena y Amorebieta-Etxano entamen un alcuentru cultural

Esti sábadu va tener llugar en La Pola la primer parte d'un alcuentru cultural ente mozos y moces de Ḷḷena y Amorebieta-Etxano que promueve Ixuxú Asturies-Euskal Herria elkartea y la Xunta Cultural Rebelgu "col enfotu de sofitar la creación moza, fomentar la rellación ente cultures y persones, visibilizar la diversidá llingüística, promocionar la música local y dar a conocer la cultura tradicional de los dos pueblos acullá de les sos fronteres". El 31 de mayu, los asturianos van devolver la visita.

 

Venti zornotzarras desplazáronse hasta Asturies pa treslladar una amuesa de la so cultura y de les sos creaciones. Asina, a les 11 y a les 20 hores, miembros del grupu de dances Udabarri va facer una amuesa de bailles vasques na plaza Alfonso X El Sabio. Pela tarde (17.30 hores) va celebrase una charra sobre l'usu del eusquera ente la mocedá d’Amorebieta-Etxano y la proyeición del curtiu de la realizadora llocal Lara Izagirre 'Next Stop: Greenland' (18.30 hores). Yá de nueche (21.30 hores), Adizión Etílika va ufrir un conciertu na plaza xunto cola banda vasca de ska Eromen.