La Pola Siero va ser sede'l sábadu de la grabación d'un videu pa defender la llingua asturiana y visibilizarla fuera d'Asturies

9 Mayu, 2014 por Redacción

Inicie sesión o rexístrese pa espublizar comentarios

Un grupu de docentes de l’asignatura de llingua asturiana de dellos centros educativos de los conceyos de Siero, Bimenes y Noreña van celebrar el Día de les Lletres Asturianes en La Pola Siero esti sábadu grabando un videu nel que visibilizar un llargu futuru a la llingua asturiana. Pa ello van siguir el camín utilizáu n'otros países como Éire o Euskal Herria d'aprovechar el tirón de la nomada 'Cup song' o 'Cantar del vasu' –'When I'm gone' ye'l so títulu orixinal– que tanto presta a escolinos y escolines, y que fixo famosa l'actriz y cantante Anna Kendrick na película 'Pitch perfect'. La versión en gaélicu suma casi seis millones de visites.

"Cola metáfora del vasu que pasa de mano en mano y la señardá por perder la esencia de lo que somos, dende Asturies, modestamente, esti videu quier contribuyir faciendo saber al restu del mundu qu'existe un sitiu que se llama Asturies que tien una llingua propia y en peligru. Y diciéndo-y a la sociedá asturiana que l’asturianu tien futuru", espliquen los organizadores, que cuenten col sofitu de los centros educativos, el Serviciu de Normalización Llinguística de Siero y la productora audiovisual Algamar, amás de la Xunta pola Defensa de la Llingua Asturiana, que pon los vasos.

Toles persones interesaes en collaborar tán convidaes a participar na grabación, prevista pa mañana a les 11.30 hores na Plaza Cubierta de La Pola Siero.