Iniciativa pol Asturianu

Iniciativa pol Asturianu
Hai venticinto años Internet malapenes taba dando los sos primeros pasos. Sicasí, la llingua asturiana entamó a dexase ver yá daquella na rede. Primero, con dalgunes esperiencies entamaes polos profesores Xelu Neira, Óscar Fernández Sierra y Jorge Feito nel portal institucional de la Universidá d'Uviéu y la llista de corréu billingüe Astur-list. Poco tiempu depués, surdieron les primeres webs en llingua asturiana. Una d’elles por iniciativa de Fernando de La Fuente y David Guardado, quien en 1996 echaron a andar lo qu'anguaño conocemos como Asturies.com. Un proyectu que nació hai venticinco col nome d’Asturia como una guía de recursos asturianos na rede y un portal informativo semanal.
 
Nesti tiempu, la tresformación d'Internet y les nueves tecnoloxíes ye bultable y eses primeres esperiencies poco tienen que ver colo que conocíemos anguaño. A lo menos na forma, porque nel fondu Asturies.com sigue siendo un cuartu sieglu depués un referente pa quien nos valimos del asturianu nel nuestru día a día. Y ye que munchos tuvimos ente estes páxines los primeros contactos coles lletres asturianes. Un espaciu de normalidá nel que conocenos, alcontranos y escuchanos y nel que poder espresanos como siempres falamos en casa.
 
Asturies.com fai anguaño un cuartu de sieglu convertíu nun referente de la información n’asturianu y nun actor imprescindible na defensa de los derechos llingüísticos de los asturfalantes. Un llabor que merez tol reconocimientu de la sociedá asturiana y que, nun tengo dulda, va siguir desendolcando otros tantos años más. Y los que faigan falta.
 

Iván Llera

Presidente d'Iniciativa pol Asturianu

Contador Estadistiques