Gil, primer asturiana de la llista d'Andecha Astur-Los Pueblos Deciden

Dulce María Gil, col númberu 15 de la candidatura, ye la primer representante d'Andecha Astur na llista de Los Pueblos Deciden, coalición integrada tamién por EH Bildu, BNG, Puyalón de Cuchas, Unión del Pueblo y Alternativa Nacionalista Canaria. Completen la presencia asturiana Paulo Arboleya (númberu 24) y Arturu Xosé Bermeyu (32). Como suplentes tán Xicu Xabel Fernandi Güerta y María Sonia Díaz.

 

Nel actu de presentación, los candidatos solliñaron les direutrices que marcarán el trabayu n'Europa, esto ye, la xusticia social, les llibertaes democrátiques, la defensa de la soberanía de los pueblos y la defensa de la Europa de los Pueblos y les persones frente a la Europa del capital. Andecha recordó tamién el so trabayu a nivel européu, "que permitió llevar nel so momentu a la Xunión Europea xabazaes mediu ambientales como les mines a cielu abiertu o la represión llingüística, y qu'agora mesmo permitió sacar a la lluz el fraude n'El Musel, dempués d'una denuncia puesta hai 6 años".

 

Les encuestes dan un europarllamentariu a Los Pueblos Deciden, lo que permitiría a los nacionalistes asturianos llevar una "planificación d'intervenciones nel Parllamentu européu dende onde defender los intereses del pueblu asturianu y onde denunciar les polítiques antisociales, de falta de llibertaes democrátiques, d'esfarrapamientu industrial, de desigualdá, discriminación, racismu, represión llingüística... Too ello dende la defensa clara del derechu al autodetermín de los pueblos y el nuesu compromisu cola superanza del modelu socio-económicu que rixe na Xunión Europea".