Xune Elipe: “La mayor novedá del discu ye sentir a Dixebra nun formatu acústicu en dos temes”

|

Los y les siguidores de Dixebra tán de norabona. La banda de Xune Elipe (Villalegre, 1962) celebra los sos 25 años de vida con ‘Dixebra XXV. 1987-2012’, un discu recopilatoriu con novedaes abondes y una edición espectacular.

Dixebra cumple 25 años con más vitalidá que nunca. ¿Pensaba que’l proyeutu qu’entamó nel 1987 diba a tener tan llargu percorríu?
 
La verdá que nun me lo podía figurar lo más mínimo. Nun sabíemos si díbemos poder aguantar un añu, cuanto menos venticinco. Lo que sí teníemos yeren munches ganes de facer coses, de tirar p’alantre...
 
Pa celebrar esti aniversariu espublicen un recopilatoriu nuevu con una edición de luxu. ¿Qué ufre esti trababayu?
 
Nel aspectu musical hai bien de versiones nueves de temes clásicos o míticos del nuestru repertoriu (‘Merucu Xusticieru’, ‘Queda la rabia’, ‘Canciu d’amor’, ‘Xuacu xinta xorra’ o ‘Si vienes’, por exemplu), remezcles y mesmamente dalgún inéditu, amás de facer un repasu pelos nuestros trabayos discográficos. Tenemos abondes collaboraciones, tanto de componentes antiguos de Dixebra como d’otros músicos de la escena folk y rock del país (Tejedor, Israel Sánchez, Rubén Bada, Lisardo Prieto, Pablo Carrera, Daniel Álvarez, Miguel Herrero, etc). D’otru llau, la producción tuvo a cargu de Sergio Rodríguez, un nome mui lligáu a la banda nos últimos años.
 
Otra manera, nel aspectu del diseñu tamos percontentos porque Navarro fixo un gran trabayu. Como bien dice, ye una edición de luxu –que se viende como un cedé normal– qu’imita la típica llibreta ‘Moleskine’, con un llibretu con semeyes y dibuxos de delles de les formaciones del grupu y aportaciones periodístiques y lliteraries (Miguel Fernandi, David Artime, Beatriz Redondo Viado, Pablo Texón y Roberto González-Quevedo). La guinda ponla un cedé que fai alcordanza del vinilo.
 
¿En qué se basaron pa facer la escoyeta de los temes?
 
Quiximos que fuere una especie d’equilibriu ente temes que sabemos presten a los y les nuestres siguidores y otros que nos apetecía retomar a nós. Nesti sen, hai clásicos de la banda y cantares que pasaron más desapercibíos pero que merecíen otra oportunidá.
 
El ‘single’ de ‘Dixebra XXV. 1987-2012’ ye ‘Merucu Xusticieru’, ún de los clásicos de la banda que facía muncho tiempu que nun tocaben en direutu. ¿Por qué esti cantar?
 
Foi ún de los primeros que compusimos. Supunxo un fitu na nuestra trayectoria y queríemos comprobar cómo sonaría anguaño.
 
Nestos tiempos que cuerren, ¿ye necesario que torne a l’aición el Merucu Xusticieru?
 
Cuerren tiempos convulsos y un tanto desconcertantes ye verdá, pero’l Merucu Xusticieru siempre tuvo ehí; nunca dexó d’actuar. Ta presente en cada militante de la reivindicación llingüística, nacional o social.
 
Otru cantar que se recupera, anque nesti casu, con lletra nueva, ye ‘Nun puxa’.
 
L’anterior versión, la que salía nel discu ‘¿Asturies o trabayes?’, dicía que los que “nun puxaben” yeren los responsables políticos asturianos, representaos nos presidentes del país, pero nesta venimos a dicir que los que nun puxamos agora somos los propios asturianos y asturianes, mui grandones, sí, pero la fuercia márchanos pela boca. Ye Asturies como país la que nun puxa.
 
¿Los vuesos siguidores van atopar otres sorpreses nesti trabayu?
 
Probablemente la mayor novedá seya’l sentir a Dixebra nun formatu acústicu en dos temes que volvimos a grabar, daqué que nun fixéremos hasta agora. Toi falando de ‘Canciu d’amor’ y ‘Vaqueira’.
 
¿Cómo suena esti discu?
 
Buscamos facer un compendiu o resume de tolos estilos que practicamos. Asina hai rock, punk, reggae, ska, funk, folk y tamién daqué de música tradicional y electrónica. Ye un trabayu mui eclécticu y variáu. Toca munchos palos, pero intentando siempre que too ello tenga coherencia.
 
Otru de los actractivos de ‘Dixebra XXV. 1987-2012’ ye’l llibretu, pola so carga lliteraria.
 
Creímos que nun yera necesario incluir les lletres de los cantares porque la mayoría son abondo conocíes, asina que decidimos dar la pallabra a músicos, periodistes y escritores amigos. El resultáu son dellos escritos que falen de lo que significó Dixebra pa ellos, pa la música asturiana, pa la llingua y pal país en xeneral. Zárrense estes collaboraciones con un cuentu mui prestosu de David Artime que se desenvuelve nun Conciertu pola Oficialidá del añu 2050 y tien un ambiente futurista con sorpresa final.
 
El discu yá ta a la venta con dos pack. ¿Qué ufre caún?
 
Esti trabayu, como dicimos con formatu de luxu, viéndese a un preciu normal, y ello porque somos conscientes de la crisis pela que toos pasamos y por tener una deferencia cola xente que-y presta Dixebra. Amás, al traviés de la nuestra páxina web pue mercase tamién una camiseta conmemorativa del 25 aniversariu.
 
Esti trabayu ta editáu por Goxe Producciones depués de la salida de L’Aguañaz de Publicaciones Ámbitu. ¿Por qué esta decisión?
 
Dende’l mes de xunu pasáu Discos L’Aguañaz yá nun ta integráu en Publicaciones Ámbitu. Siguimos el nuestru camín otra vuelta en solitario. Agora esta marca sigue pero como la división musical d’un proyectu más ampliu llamáu Goxe Producciones. La nuestra idea ye tocar otres estayes, como la editorial, la formación, l’audiovisual, etc. Ye un proyectu integral que tien a la llingua y cultura asturiana como exa fundamental del so trabayu dende parámetros militantes y empresariales. Esti discu de Dixebra ye la primer referencia y la presentación en sociedá de Goxe Producciones; afita en cierta manera la llinia a siguir: trabayos mui especiales con una presentación mui cuidada col aquel de da-y prestixu y valir a lo que se fai nel nuestru idioma.
 
¿Tienen previsto dalgún conciertu pa presentar esti recopilatoriu?
 
Tábemos preparando un conciertu-presentación n’Avilés coincidiendo col 6 de xineru, día nel que se cumplen venticinco años del primer ensayu de Dixebra, pero al final nun va poder ser porque nun tuviemos respuesta por parte del Conceyu d’esa ciudá, asina que va haber que dexala pa más p’alantre. Lo que sí ta yá confirmao ye que vamos presentalu en Madrid el 14 d’abril.
 
El 2011 foi l’añu más internacional de Dixebra, con dellos conciertos fuera d’Asturies. ¿Qué balance fai de la xira ‘Bailla la crisis’?
 
Positivu enforma. Tocamos en bien de llugares del país y, como novedá, espardimos tamién la xira a otros países del Estáu. Asina, fuimos a Madrid, Zaragoza, Gasteiz, Donostia, etc. Yera daqué que teníemos pendiente dende hai tiempu y que nos apetecía muncho.
 
¿Cómo ye la respuesta del públicu nestes actuaciones?
 
Dixebra ye una banda bien conocida fuera d’Asturies, sobre manera nos ambientes de la reivindicación llingüística y nacional d’Euskal Herria, Galiza, Països Catalans, Cantabria, Castiella y Aragón. Siempre que vamos tocar per ehí venimos cola sensación de que la xente aprecia la nuestra propuesta y coincide nos nuestros planteamientos. El públicu conoz quién ye Dixebra y munches de les bandes nueves d’esos países coles que coincidimos dícennos que cuando empezaben sentíen a Dixebra.
 
¿Hai dalguna sorpesa prevista pal 2012?
 
Pal añu qu’entra la nuestra intención ye conmemorar el 25 aniversariu con una xira curiosa per Asturies y volver a salir fuera. Amás tamos yá empezando a componer temes nuevos y grabando maquetes de cara al proxímu discu, que queremos tener na cai nel segundu semestre del 2012.

Contador Estadistiques