Verdes-EQUO: “De siempres la nuesa esmolición ye que la transición ecolóxica sía xusta y solidaria”

Verdes-EQUO, marca cola que se presenta Alternativa Verde por Asturies-EQUO pol centru y l'occidente, repite la fórmula de la cocandidatura nes eleiciones del 26-M. Nel casu d’algamar escañu, Eva del Fresno (Mieres, 1977) ocuparíalu los dos primeros años, pa darréu dar pasu a Enrique Fernández (Cangas del Narcea, 1966).

EQUO vien emplegando últimamente la etiqueta Alternativa Verde. ¿Por qué esti cambiu?

Eva: Lo del nome yera un tema que la xente al rodiu de nuesos sacábenos munches veces pa dicinos que fixéramos daqué, porque equí n'Asturies EQUO sonába-yos raru y echaben en falta los sos Verdes de tola vida. Nuna asamblea dímonos cuenta de que los nuesos estatutos permitía’l cambiu y votamos pa llamanos Alternativa Verde por Asturies-EQUO, que ye'l nome completu que tenemos agora. Nes autonómiques acortámoslu pa la papeleta y quedó Verdes-EQUO. Amás, Los Verdes yera en masculín, polo que nun emplegamos  l'articulu.

El 26-M, al igual que nel 2015, preséntense con dos candidatos, muyer y home.

Kike: Pa nós la paridá entre muyeres y homes ye perimportante y toles voceríes internes del partíu son dobles: tenemos dos persones y non una sola. Pueden ser un compañeru y una compañera, o si la xente quier que salgan dos moces val, pero non dos homes. Los muérganos internos tamién son paritarios y si tán formaos por un númberu impar ye a favor de la muyer pa da-yos sofitu y que participen na vida política. Les cocandidatures facémosles pa treslladar la nuesa propuesta a la sociedad de repartu de los espacios, les presencies y les decisiones al 50 por cientu. N’otros países europeos ta faciéndose tamién dende hai bastantes años.

¿Qué diferencia al so partíu con respeuto a otros que s’autocalifiquen d’ecoloxistes o respetuosos col mediu ambiente?

Eva: L’ecoloxismu agora paez que lu quieren tolos partíos, pero d'estos años que Los Verdes llevaben en solitariu glayando p’avisar del cambiu climáticu, y que nun-yos fixeren casu nengún, pue sacase la conclusión de que sólo con presión se consigue un cambiu nes polítiques estructurales. Hai munchos intereses creaos como pa que les coses cambien soles o d’un día pa otru. Nós llevamos defendiendo la ecoloxía munchu tiempu y sabemos non solo qué hai que facer, sinon cómo facelo pa nun dexar p’atrás a naide. Ésa ye de siempres la nuesa preocupación: que la transición ecolóxica sía xusta y solidaria.

Asturies véndese col eslogan ‘Paraísu Natural’, pero tamos lideramos los índices de contaminación a nivel estatal. ¿Hai una dexadez por parte del Gobiernu socialista nesi sen?

Kike: Hai un problema que nun ye nuevu y que debemos solucionar. Ye necesario tomar conciencia coleutiva de la realidá de la contaminación n'Asturies. Tamos sobrepasando los niveles y tamos respirando venenu, y eso nun ye negociable nin almisible. El Gobiernu tien que ser más firme y nun tomar decisiones a plazu curtiu pa safase de les crisis más graves. Esto va pasar munches vegaes más y la xente nun-yos va a perdonar si nun-y ponen remediu agora pa protexer lo meyor que tenemos: la nuesa salud, la nuesa tierra, l’aire, l’agua…, que queremos llimpios. Nun hai dinero que lo pague si lo perdemos. Hai qu’escaecer la idea de que la llucha escontra la contaminación llévanos a perder dineru y puestos de trabayu. Nun hai trabayu pa naide nun planeta muertu.

¿Cómo consideren que debe afrontase’l procesu de descarbonización n’Asturies?

Eva: Yera un fechu inevitable pal que los Verdes pidimos que s’entamaren midíes efeutives y se buscaren alternatives pa nun tar agora cola incertidume que tán viviendo les Cuenques. Nun se trata de tener una posición o otra énte los fechos, sinón de proponer soluciones a los problemes. Na evolución nun sobrevive'l más fuerte, sinón el que ye quien a afaese a los cambios. Nun podemos perder nin un minutu na señardá o na defensa de lo que yá ta perdío. Tenemos que trabayar dende'l mayor consensu social posible pa encarar el cambiu climáticu y los cambios radicales nel emplegu y na actividá económica que se van producir nos años próximos.

Precisamos invertir muncho más n'investigación. Los grandes retos de la humanidá sólo podemos encaralos dende l'analís seriu y el trabayu decidíu. Nun valen los escurrimientos.

¿Cuáles son los puntos principales del so programa no social?

Kike: Defendemos percima de too la igualdá social y de xéneru. Somos ecofeministes y creemos qu'hai que poner nel centru de les polítiques a les persones y los cuidaos que precisamos pa llevar una vida digna. El restu del sistema tien que sirvir pa eso, pa consiguir que síamos una sociedá onde la xente viva bien y de manera sostenible, lo qu'implica cuidar tamién del planeta y de la nuesa casa común.  Esmoleznos garantizar que la transición ecolóxica nun se faiga dende una perspeutiva de competencia polos recursos, sinón dende la cooperación. Por eso abogamos  por un parque públicu de viviendes n'arriendu o la Renta Básica y la defensa del sistema de bienestar. Especialmente la transición nun pue facese ensin les muyeres, el 50 por cientu de la población, y les polítiques d'igualdá tienen que promover la so inclusión nel emplegu verde. Amás, la prevención en materia de violencia de xéneru tien que ser fundamental: hai qu'educar y camudar la mentalidá d'una sociedá machista que tien que preparase pa poder actuar de forma responsable ensin delegar la responsabilidá del so comportamientu, nin nes víctimes nin na capacidá punitiva de la xusticia.

¿Será oficial l’asturianu nesta llexislatura?

Eva: Pue que non nesta llexislatura, pero de xuru será oficial si se fai bien. Una llingua, y amás la nuesa, ye un bien cultural, un arte nel que toos y toes formamos parte y tamién tola  xente que nun ta y que la faló enantes. Ye un arte que nun val pa tar colgao nuna parede; ye un arte pa usar y facenos pensar y sentir. Falar ye lo más importante que facemos les persones porque ye la base de tolo demás. Ta bien tener munches llingues y cuidales y falar delles, por eso la oficilidá l'asturianu ye importante, pa cuidalo como dalgo perimportante que ye. Lo que nun entendemos ye qu’eso xenere oposición. Nós nun queremos imponer nada. La llingua ye un nexu d’aunión na nuesa familia asturiana y esa aunión nun se debe imponer; debe servir pa auninos, non pa separanos.