Tejedor: “Los premios con ‘Volviche’ animarán a munchos críos de Cuaña a aniciase na música asturiana”

Premiu al Meyor Cantar del añu 2013 y Premiu AMAS al meyor cantar folk. Ésti foi’l doblete qu’algamó recién la Banda de Gaitas El Trasno col tema ‘Volviche’. Javier Tejedor Mier (Avilés, 1974) ye’l direutor d'esta agrupación con sede en Cuaña.

¿Cómo recibió Cuaña la victoria de la banda gaites llocal nel Premiu al Meyor Cantar?

Imaxine… Depués de recibir la selmana anterior un Premiu AMAS a la meyor canción folk por ‘Volviche’, los ánimos de familiares, amigos y vecinos taben a tope, pero’l Premiu al Meyor Cantar confirmó toles espeutatives que punxéramos nesta canción.

¿Nun vos sorprendió l’esitu de ‘Volviche’?

Cuando compones la to propia música yá partes de la base de que sientes les coses mui tuyes. El fechu de poder espublizala yá ye un ésitu nos tiempos que cuerren, pero ver  cómo la xente disfruta y, sobre manera, entiende’l sentir d’esti cantar ye dalgo qu’emociona y te llena. ¿Sorprender? Al poner en circulación una canción sabes que pue ocurrir cualesquier cosa pa bien o pa mal, pero nesti casi teníemos confianza plena ne que’l trabayu taba bien fecho.

¿Cómo se xestó esti cantar con lletra de Xosé Miguel Suárez Fernández ‘Tapia’?

La verdá que foi una de les meyores esperiencies que tuviera na música. Ocurrió dalgo que nun pasa de forma habitual y foi xuntar a delles persones que nun se conocen ente sí pa da-y forma a un cantar en cuatro díes: música, lletra, voz y músicos d’ámbitos artísticos distintos que fuimos quien a sintonizar hasta l’estremu de que’l resultáu, como me presta dicir, foi un tema redondu; una canción que güel a occidente y que representa y identifica esta tierra.

Too surde cuando decidimos incorporar un tema cantáu de creación nueva al discu. La llingua cola que la xente de Cuaña siéntese identificada ye la fala y, ensin pensalo un minutu, ‘fuimos’ a por Tapia. Ernesto, ún de los miembros de la  banda, ye un gran siguidor de Xosé Miguel, mostróme dalgunos de los sos poemas y inspiráronme la música de forma fácil, anque la lletra pa la música pa ‘Volviche’ taba ensin escribir tovía.

¿Y la collaboración con Kike Dembinsky?

A Kike conocílu cantando na presentación del discu de les Pandereteres de Fitoria y la so voz sorprendióme; paecióme una voz fresca y que se dexaba sentir con muncha facilidá. La sensación al sentilu cantar trespórtate a aquello que dicen les lletres y por ello guardéme la idea de contar con él pa proyeutos futuros, hasta que con El Trasno llegó esi momentu. A la xente de la banda pregunté-yos que voz queríen, d’home o de muyer, decidieron que preferían voz de home –tamos falanado d’una banda formada na so mayoría por moces– y darréu salió’l nome de Kike. Y salió bien. ¡La conexón y el resultáu de la nuesa música y Kike ye perfeuta!

‘Volviche’ forma parte del primer álbum d’El Trasno, ‘Axeitín’.

La banda cumple 15 años y queríemos facer daqué especial. Nun hai nada más importante pa un grupu qu’espublizar un discu y, amás, reuniéronse una serie de condiciones qu’acompañaron: la banda pasa pel so meyor momentu y la madurez musical de los sos miembros invitaben a embarcanos nesta aventura que da entamu hai un añu.

Ésti tien dos temes cantaos, ‘Volviche’ y ‘La capitana’. ¿Por qué esta versión de l’habanera de Carlos Rubiera?

‘La capitana’ taba nel repertoriu habitual de la banda y paeciónos una de les pieces que  nun podíen faltar. Ye dalgo asina como ún de los diez cantares imprescindibles. La única dulda yera facer una versión instrumental o pone-y voz, dalgo que  nun tuvo muncha discusión, yá que tener una voz nel discu paecíanos un puntu adicional dientro de lo que representa’l repertoriu puramente instrumental d’una banda de gaites. Tanto nos gustó’l resultáu final que decidimos facer un segundu tema cantáu; asina nació ‘Volviche’.

¿Qué tal recibimientu ta teniendo’l discu ente’l públicu?

Sobre manera, el públicu recibe la nuesa música con munchu ciñu. Pa munchos supón una inyeición fuerte d’idees pa lo qu’acostuma a ser una banda de gaites, representaes de forma principal por un bon númberu de creaciones nueves que sumar a les sos biblioteques.

La xente interesao en mercar el discu pue atopalu nel Estancu Covadonga, Casa Cecilio, Inmobiliaria Prada y Sidrería La Magaya (Navia);  Hotel Restaurante A Retoral (Cuaña); Decoraciones Álvarez (A Caridá); Mesón El Fornello (Porcía); Café Trisquel y Discos Piraña (Xixón); Librería Santa Teresa y Cervecería L'Esperteyu (Uviéu); Discos Eusebio (Mieres); taller del constructor de gaites Chus Solís (Llangréu); Peluquería Longinos (Cangas del Narcea); Tasca Marinera del Puerto (San Esteban); y Vinos Francos (Trevías). Amás, tamién pue consiguise al traviés del cualquier miembru de la banda, llamando al nuesu teléfonu 620.412.031 o nel corréu electrónicu bgeltrasno@gmail.com.

Tornando al Premiu al Meyor Cantar, ¿qué nivel vio esti añu?

Quiciabes pudiera ser una entruga comprometedora, pero nesti casu l’almiración y el ciñu que siento hacia los nuesos compañeros permíteme asegurar que foi la edición con más nivel de las celebraes hasta agora.

¿Qué supón pa El Trasno ganar esti concursu?

Supón abrir les puertes d’un sector musical onde nós queríemos posicionanos tarde o temprano, pero que, d’otra forma, al ser una banda de gaites, nos llevaría un poco más de tiempu.

La pena ye que nesta ocasión el ganador nun pue representar a Asturies nel Liet International, que nun va celebrase per segundu añu consecutivu.

Ye una verdadera pena que nun se celebre, sobre manera pola oportunidá que se-y da a la llingua asturiana de llegar a mediu mundu. Amás tenemos el convencimientu de que ‘Volviche’ tendría toles opciones de poder trunfar ellí. Deseamos que n’ediciones próximes torne a celebrase.

¿Ye importante caltener el Premiu al Meyor Cantar?

Lo que naide se plantega ye que, depués que’l Premiu al Meyor Cantar tea consolidáu, ésti pueda  llegar  a desapaecer nunca. Músicos, grupos y escritores en llingua asturiana reciben cada añu la convocatoria al meyor cantar como la mayor plataforma de promoción y divulgación de la nuesa llingua.

¿Cuándo surdió la Banda Gaitas El Trasno?

La banda naz dientro de la Escuela de Música de Cuaña. Hai 16 años llamáronnos pa dar clases al mio hermanu Jose –qu’anque nun ye miembru activo de la banda pon clases de gaita a munchos de los integrantes y siempre tuvo implicáu nos proyeutos– y a min, cola idea de crear una banda de gaites en Cuaña. Paecía necesaria y anguaño pue dicise que taben no cierto. Tamos falando d’un pueblu pequeñu que ye quien a caltener la so cantera musical y una banda que nunca dexó de medrar.

¿Cuántos miembros tien anguaño?

El Trasno tien una ventena d’integrantes. Pue dicise que ye sostenible con esi númberu.  Per un llau, nun me gusten les bandes demasiao numberoses, y per otru, col númberu d’alumnos colos que contamos, hai que tar satisfechos de poder tener una banda cola calidá que tien.

¿Hai cantera de gaiteros en Cuaña?

Mientres los 15 años últimos nunca hebo menos de 30 alumnos ente gaita y percusión. Tamos convencíos de qu’estos llogros animarán a munchos críos del conceyu a aniciase na música asturiana.

Otra manera, vusté tamién ye cabeza de Tejedor xunto col so hermanu. ¿Qué planes tien el grupu pa esti 2014?

Esti añu cúmplense 15 años de la grabación del nuesu primer discu ‘Texedores de suaños’ y tenemos preparaes dalgunes sorpreses pa desendolcar a lo llargo d’esti 2014. Pronto podremos dar información más concreta.

Semeya obra de Manolo Lebredo.