Seoane: “Lo meyor pa mantener la frescura d’un blog ye facelu en collaboración con delles persones”

Esti sábadu, día 12, ye la tercer edición del Sidra&Blogues. Tin Seoane (Llangréu, 1980), autor del blogue Trayasgaya, ye ún de los organizadores de la cita que tien como oxetivu premiar a los meyores blogues y disfrutar d'una xornada en comuña.

 
¿Qué ye un Sidra&Blogues?
Un Sidra&Blogues nun ye más que una escusa pa poder vese y falar de temes comunes que nos interesen; una forma de facer comuña. Lo que venimos faciendo dende l'añu pasáu ye facer medrar esti conceutu, amestando al actu la entrega premios del meyor blogue del añu y una serie de charres pa que too ello faiga del Sidra&Blogues el gran alcuentru blogueru anual de la xente que fai blogues n'asturianu.
 
¿En qué van a consistir les charres d’esta edición?
En total hai tres intervenciones. Cúmplese un añu del entamu de ximielga.me y dempués del éxitu d'algamar más de 2000 usuarios ye un bon momentu pa facer balance. Amás, el responsable de ximielga.me ye un conocíu blogueru, asina que naide meyor qu'él pa entender el sentíu d'esti Sidra&Blogues.
Llueu vamos tener la presentación de firefox 4 por parte de Softastur ye una forma de dar a conocer el trabayu que ta faciendo esta xente. Un restolador web ye la ferramienta básica d'un blogueru. Creemos mui interesante la presentación de la nueva versión 4 de Firefox, el restolador más usáu n'Europa y na que se va a amosar les novedaes y meyores de cara al usuariu.
Mentes, la Biblioteca María Xosefa Canellada ye otru d'esos grandes trabayos que tienen que ver cola rede y cola llingua. Esti III Sidra&Blogues ye una bona oportunidá pa conocer el testimoniu de primer mano de la persona que lleva faciendo esta xera dende 2008.
 
Dempués de les intervenciones d’estos espertos llega la entrega de premios. ¿Cuántes categoríes hai?
Esti añu tenemos tres categoríes con tres premios estremaos. La primera nómase ‘Meyor Conteníu’ y ta esbillada pola xente que fai blogues n'asturianu. La segunda ye la de ‘Meyor diseñu’, onde tamién voten sólo los blogueros y blogueres. Y la última ye la de ‘Votu del Públicu’, que ye una categoría abierta a tol mundu.
 
¿Cómo se recueyen los votos?
Los dos años anteriores fiximos el recuentu a mano. La xente mandaba un corréu coles sos votaciones y díbamos sumándolos según llegaben. Esti añu evolucionamos y gracies al software llibre que nos ufierta Drupal, los votos sumáronse automáticamente. Por primer vegada dimos la pallabra a la xente que nun tien un blogue propiu y quier opinar nes votaciones, averando esta iniciativa y la bloguesfera mesma a tola xente. Esti cambiu tien como fín cimeru’l fechu d'intentar esparcer el mensaxe lo máximo posible. Sicasí, los premios del conteníu y el diseñu siguen tando votaos polos propios compañeros y compañeres que faen blogues, lo que pa mí da un valir especial a estes dos menciones.
 
El programa d’actos, faciendo honor al nome del eventu, inclúi una espicha. ¿Ye compatible la sidre cola informática?
Home, si lo mezcles muncho igual salen chispes, en tolos sentíos (rises). Al final hai que dase cuenta que too esto tien un componente llúdicu perimportante. La folixa, el conocer xente, falar, compartir idees y l'entretenimientu son los pegoyos que nos andechen a sofitar esti actu. Ye verdá que ye un alcuentru cultural, onde pretendemos sofitar la nuesa cultura y da-y puxu na rede y na sociedá al asturianu, pero too ello engalanao d'un ambiente folixeru ente collacios que se xunten una vez a l'añu y que quieren conocer más xente que s’esmolezca poles mesmes coses.
 
¿Cómo foron los primeros pasos del Sidra&Blogues?
El primer Sidra&Blogues foi’l 24 payares del 2007, aprovechando una manifestción del Conceyu Abiertu pola Oficialidá n'Uviéu. Foi un alcuentru informal que se llimitó a quedar nun chigre pa falar y conocenos. Yera un tiempu onde casi nun había interrelación ente la xente que facía blogues. Nun nos conocíamos y casi too lo que se facía yera por primer vegada. Un tiempu d'una bloguesfera moza, más amateur que la d'anguañu y casi más inocente nos conteníos. La intención d'esi primer Sidra&Blogues yera la de facer una Xunta de Blogues en Llingua asturiana pa que nel futuru se pudieran entamar otru tipu d'alcuentros que necesitaben más trabayu organizativu.
Durante l'añu 2008 nun hubo alcuentros y esa necesidá de siguir conectaos foi la que nos llevó a entamar el certame del meyor blogue del añu, que se votó por primer vegada en xineru de 2009. Al repetir estes votaciones al añu siguiente, ocurriósenos facer una entrega de detalles a los premiaos, trespasando les llendes de la pantalla l'ordenador y organizando aquel ansiáu alcuentru blogueru del qu'entamamos a falar nel 2007. D'esa forma, baxo'l nome de II Sidra&Blogues, fiximos el 20 de febreru del 2010 un alcuentru con charres, entrega premios y sidre en Ciañu. Esti sábadu en La Pola nun facemos más que siguir con esti formatu.
 
¿Apuesten por un un certame intinerante o tán na gueta d’un sitiu onde establecelu?
La primer idea yera dir cambiando de sitiu cada añu, pero esto nun depende de nós. Necesitamos la collaboración del serviciu de normalización llingüistica de cada conceyu onde organizamos el Sidra&Blogues. Cuando falamos colos responsables de normalización proponiéndo-yos la idea, pidimos un sitiu físicu onde poder facelo, asina como una serie de soportes pa facer les charres. Si pal añu que vien nun atopamos esti sofitu n'otru conceyu, nun descartamos repetir sitiu.
 
¿Quién forma la Xunta de Blogues en Llingua Asturiana?
La Xunta de Blogues nun ye una asociación dada d'alta con estatutos y demás. Ye un nomatu virtual qu’acuñamos nel 2007 pa poder firmar tola serie de proyeutos que teníamos na tiesta. Nun queríamos que toes estes iniciatives tuvieren firmaes por tres o cuatro blogues a nivel individual, porque yera un bien común de tola bloguesfera. Esti nomatu ta al serviciu de cualesquier reunión de más de dos persones que faigan blogues n'asturianu y tengan un proyeutu en mente relacionáu cola bloguesfera. Yá diximos delles vegaes que lo último que queremos ye que hayan dos o tres asociaciones de xente que fai blogues y que trabayen por separao. Yá tamos bastante dixebraos.
 
¿Cuál ye’l perfil d’una persona que cuenta con un blog?
Los perfiles de la xente son tan estremaos como les temátiques de los propios blogues. Los blogues son ferramientes de comunicación, pero cada ún pue utilizalu pal so fín personal. L'entamu por xente mozo dió pasu a una mayor bayura d'edaes, colo qu'ello conlleva nel tarrén de les temátiques, inquietúes y oxetivos. Normalmente ye xente creativo, internautes activos con necesidá de dar a conocer les sos idees nel formatu que tean y con una migayina d'egocentrismu friki, nel bon sentíu.
 
¿Supón muncho esfuerzu mantener un blog al día?
De mano non. Hai vegaes que tienes delles idees al día pa facer entraes nueves, pero al cabu de 5 años cánsase de too. Ye complicao mantener la frescura y la orixinalidá y camiento que la meyor solución ye facer un blogue collaborativu ente delles persones pa asegurar la so supervivencia. Les nueves modes y la facilidá de postiar nes redes sociales y el microblogging faen que l'esfuerzu de facer una bona entrada nel blogue seya mayor. Pero nun hai na que nun se igüe con imaxinación y compromisu.
 
¿Cómo ye la salú de la bloguesfera asturiana?
Home, depende cómo lo mires. Si pienses qu’hai una llingua que l'alministración ta dexando morrer y que se usa diariamente na rede por cientos de persones pa falar de tolos temes imaxinables, paez que tien un futuru perbonu. Y más pensando en qu’esa xente trabaya en comuña y tien la capacidá y la voluntá d'entamar proyeutos como'l Sidra&Blogues. Per otru lláu, la velocidá a la que avancen les nueves tecnoloxíes y les modes fai que pasara’l ‘boom’ de los blogues y l'efeutu estancamientu seya nidiu. Esto nun ye de preocupar porque vémoslo tamién nes bloguesferes d'otres llingues. Veremos si’l microbloggin mata al blogue o si conviven nel futuru. Yo creo qu’hai sitiu pa too.
 
¿Cuánta xente cuenta con un blog n’asturianu?
Vimos nes votaciones que'l númberu de xente que votó caltiénse comparado col añu pasáu. Andamos cerca del mediu centenar de blogues, pero eso nun son los blogues activos, son sólo los que votaron, porque hai dellos blogues qu'espublicen semanalmente y nun participaron nes votaciones. Hai delles páxines de sindicación de Rss con más de 100 blogues y lo bono ye que cada añu que facemos votaciones atopamos blogues nuevos que nun conocíamos. Ye complicao poner una cifra, aunque l'añu pasáu falóse de cerca de 200 blogues.
 
¿Ye mayoritariu’l castellanu ente los blogueros asturianos?
Home, ta claro que sí. Nun se pue nin se debe competir con eso porque nun tien nada que ver. Nun sólo esbilles una llingua en base a les tos idees, sinón en base a la población diana a la que quiés llegar y ente l'asturianu y el castellanu nun hai collor nesi sen. Si lo que quiés ye facete ricu col to blogue, tener munches visites y llegar a millones de persones, l'asturianu nun ye la meyor opción y quiciabes el castellanu tampoco. Un datu curiosu ye que la familiaridá de les relaciones nes redes sociales fai que l'amestáu seya una llingua usada por munchos usuarios.
 
Pa zarrar, ¿qué conseyu daría a una persona que quiera entamar a facer un blog?
Que lu faiga n'asturianu y que'l sábadu 12 venga al Sidra&Blogues a la Pola (rises). Nada, lo importante ye pasalo bien, que ninguno vivimos d'esto y tien que servir pa desfogar y entretenenos. Nun hai qu'escaecer que la xente que fai blogues gasta’l tiempu llibre en facelo, la mayor parte los casos ensin reconocimientu nin sofitu nengún.