Sánchez Vicente: "La repetición de les eleiciones ye un fracasu de los ciudadanos, non de los políticos"

|
Sánchez Vicente: "La repetición de les eleiciones ye un fracasu de los ciudadanos, non de los políticos"

Queda una selmana pal 26 de xunu, xornada establecida pa la repetición de les eleiciones estatales tres el fracasu de les negociaciones ente los distintos partíos pa conformar gobiernu. El comentarista políticu Xuan Xosé Sánchez Vicente (Xixón, 1949) trató con Asturies.com sobre dellos aspeutos alredor d'esta cita coles urnes.

¿Tamos énte un fracasu de clase política con esta repetición d'eleiciones?

Yo nun creo que sea un fracasu de los políticos, ye un fracasu los ciudadanos. De mano porque los partíos saben que si lleguen a alcuerdos 'col enemigu' pierden los tifosi, digo, votantes. Lo segundo, porque son los votantes los que voten sabiendo que con esi resultáu ye imposible, o casi, l’alcuerdu. O, por meyor, voten lo que-yos apetez ensin pensar nos resultaos.

Ente les candidatures nun atopamos nenguna propia d'Asturies. ¿Siguimos siendo los asturianos incapaces de construyir un discursu nacional?

Por desgracia, sí. Y, amás, yo creo que tamos mui lloñe –a años lluz– de lo que ven delantre los asturianos (la mayoría la población). Esto ye, nun nos ven.

La candidata de Xuníos Podemos falaba hai poco de que yera imposible construyir un frente común en Madrid pa defender los intereses xenerales d'Asturies pola falta d'una mesma visión pa solucionar los problemes del país.

Bueno, yá se sabe. Los partíos centraliegos son siempre centraliegos y equí voten lo que-yos manden (exemplu, l’alcuerdu contra’l carbón de IU-Podemos).

¿Cree correuta la estratexa de Foro de dir en coalición col PP p'asegurar l'escañu?

Home, ellos sabrán. De momento paez que salen gananciosos. ¿Pa qué? Ésa ye otra cuestión.

¿Pue ser esta maniobra la so sentencia de muerte de cara a les próximes eleiciones autonómiques y municipales?

¿Van dir separaos? Nun lo sabemos. ¿Van pagalo nesi casu? Tampoco.

¿Un posible 'sorpasso' de Xuníos Podemos a la FSA ye una bona noticia p'Asturies?

Eso ye solo una bona noticia pa ellos.

Dende la so perspeutiva histórica, ¿ta d'alcuerdu cola xente que compara'l proyeutu de Podemos col PSOE de finales de los 70 y qu'afirma que tamos énte un cambiu xeneracional?

Nun se paez en nada. Dicir otra cosa son metáfores. Lo del cambiu xeneracional dícenlo les encuestes, lo que nun sabemos ye en qué consiste (bueno, yo creo que sí, pero allá ellos y los sos votantes-creyentes).

¿Qué resultáu pronostica pal 26-X?

¡Ai, fiyu, eso ye como’l gatu (¿o yera’l ratu)) de Schrödinger! Hasta que nun abramos les urnes nun sabremos si hai gatu, y, sobre too, si ta vivu o muertu o si va haber 'gatu encerráu'.

Contador Estadistiques